Петропавл-Алматы пойызындағы «жолаушы» қойдың видеосы жұртты таңғалдырды
Көлік полициясы тамбурда тасымалданған қойдың иесін анықтады
Әлеуметтік желілерде жолаушылар пойызының тамбурындағы қойдың видеосы тараған болатын. Роликтің авторы оқиға 10 тамызда Петропавл — Алматы пойызы вагондарының бірінде болып жатқанын айтады.
Ішкі істер министрлігінің көліктегі полиция департаменті видеоны тексеріп, кейін растады.
«Биыл 10 тамызда полиция қызметкерлері Петропавл — Алматы бағытындағы жолаушылар пойызында жұмыс істемейтін тамбурда үй жануарларын тасымалдау фактісін анықтады. Ол вагонның 40 жастағы жолсерігіне тиесілі болып шықты. Айтуынша, ол қойды өсіру үшін сатып алған», — деді полиция департаментінің баспасөз қызметі.
Аталған факті бойынша жиналған барлық материал құқықбұзушыны әкімшілік жауапкершілікке тарту үшін Ақмола облысының көліктік бақылау инспекциясына берілген.
Сондай-ақ, «Түрксіб-Астана» ЖШС және «жолаушылар тасымалы» АҚ басшылығының атына лауазымды тұлғаларды тәртіптік жауапкершілікке тарту туралы ұсыныс енгізілген.
