СҚО-да 150 елді мекен үш күннен бері жарықсыз отыр
![](https://matritca.kz/wp-content/uploads/2023/11/img_2017-780x470.webp)
СҚО Төтенше жағдайлар департаментінің мәліметінше, өңірде әлі күнге дейін 18 қараша күні болған боранның салдарымен күресіп жатыр.
«Сол күні СҚО бойынша республикалық жолдарда 9 учаске жабылды. Сондай-ақ аудандық бөлімшелер, жолаушылар тасымалы және автокөлік жолдары басқармасы өз күшімен облыстық, аудандық маңызы бар жолдарды жапты.
Шал ақын ауданында Газель көлігі жолдан шығып кетті. Сол күні 60-тан астам адамды үш аудандағы 4 жылыту пунктіне орналастырдық», — дейді департаменттің бөлім бастығы Сәкен Ағзамов.
Боранды күні малын іздеуге шыққан үш адам жолдан адасып кеткен. Олардың бәрі аман-есен табылды.
«18 қараша күні 11 ауданда электр желісі істен шықты. Салдарынан 217 елді мекеннің 33 мыңнан астам абоненті жарықсыз қалды. Бүгінде жөндеу-қалпына келтіру жұмыстары жүріп жатыр. Қазіргі уақытта 21 мың адам тұратын 150 елді мекенде жарық жоқ», — дейді Сәкен Ағзамов.
Естеріңізге салайық, СҚО-да бір тәулікті айдың нормасындағы қар жауғанын айтқан едік.
Жабысқақ қар мен қатты жел салдарынан электр тарату желілеріне мұз қатып, үзілді. Қазір апат орнында электрмен жабдықтаушы компанияның бригадалары жұмыс істеп жатыр.