Тұңғыш президенттің ірі көлемде ақша жымқырды деп сотталған немере інісі Қайрат Сатыбалдының жазасын қайда өтейтіні белгілі болды, деп хабарлайды Azattyq Ruhy.
ҚР ІІМ Қылмыстық-атқару жүйесі комитетінің өкілдері мәлім еткендей, Қайрат Сатыбалды жазасын Шығыс Қазақстан облысындағы арнайы мекемеде түзейді.
«Жазасын орташа қауіпсіздік мекемесінде өтейтін сотталғандар үшін Шығыс Қазақстан облысы бойынша ҚАЖ департаментінің №22 мекемесі (ОВ-156/20) қарастырылған», — делінген комитет хабарламасында.
Еске салсақ, тамыз айының соңында Сыбайлас жемқорлыққа қарсы қызмет Қайрат Сатыбалдыұлының және басқа да тұлғалардың «Қазақтелеком» АҚ және «Көлікке қызмет көрсету орталығы» АҚ-да аса ірі көлемдегі қаражат жымқыру фактісі бойынша сотқа дейінгі тергеуді аяқтаған болатын. Қыркүйек айының соңында сот оны алты жылға қауіпсіздігі орташа мекемеде өтеу туралы үкім шығарды.
