Майбұлақтан шыққан тарландар

Толарсақ, тоқпан жілік санда болар,
Ақ орда, алтын үстел ханда болар.
Ер жүрек, жақсы жігіт елден шықса,
Туған елге жақсылық сонда болар.

Алтын ана,
Қуаныш Төлеметовтің апасы.

Әркімнің кіндік қаны тамған қасиетті мекені болады. Ол - туған жер. Менің туған жерім - Майбұлақ. Майбұлақ - ОҚО, Төлеби ауданында орналасқан, талай дарын иелерін тәрбиелеп шығарған ауыл. Ол мені құшағында мәпелеп өсіріп қана қойған жоқ, дала тәлімін, тәрбиесін берді.

Мен керіліп жатқан кең даламнан бойыма кеңпейілділікті сіңіріп келемін. Басымнан жаймен ғана сипайтын ерке желден еркіндікті үйренсем, бір байыппен ағып жатқан өзен суларынан сабырлылықты, қыбыр-жыбыры таусылмайтын жәндігінен еңбекқорлықты үйреніп, өсіп келемін.

Менің Майбұлағым - жағасы көк майсалы жасыл құрақпен көмкерілген, суға қарай келіншектей иілген сәмбі талдары сан-мың құстардың қан базарына айналған керемет мекен. Өзен жағасындағы қып-қызыл бүлдіргендері мен қызыл-сары доланалары ауыздың суын құртатын тәттілігімен тамсандырып, кісінің есін кетіретін шұрайлы жер.

Майбұлақ, негізінен, өзен атауы. Аты айтып тұрғандай, Майбұлақ - суы мөлдір, сұлу өзен әрі балығы да көп болған деседі. Кезінде Майбұлақтың суындағы балықтардың көптігінен аттар үркіп, су іше алмайды екен. Кешке бақалары жабылып кеп шулағанда, Майбұлақтың төңірегі думанға толып кеткендей әсерге бөленеді екен. Қазір де сондай. Осы өзен жағасында ата-бабаларымыз қоныс тепкендіктен, ауылдың атын «Майбұлақ» деп атапты.

Қу ағашты шанши салсаң, көгеріп, жайқалып шыға келетін Майбұлақ ауылының перзенттері тау мінезді, тау тұлғалы, тауға ұқсаған ірі болып келеді. «Ел ерімен еңселі» демекші, Майбұлақтан қазақы мәрттікті жанына серік еткен талай азаматтар мен туған жер төсінде еркелеп өскен әпкелеріміз өсіп шыққан.

Нақтырақ атап айтатын болсам, солардың ішінде Қазақстан Республикасына танымал болған әпке, аталарым: Қуаныш Төлеметұлы, Ақжол Асқарұлы, Сатыбалды Қосалыұлы, Гүлнәр Сиқымбаева, Ақсақал Қалмырзаев, Байғали Есеналиев. Мен бұл кісілердің есімін ерекше құрметпен, ерекше сезіммен, үлкен мақтанышпен айта аламын. Осы азаматтардың барлығының үлкен белеске жетулеріне септігін тигізген – туған жердің қара топырағы. Оны Қуаныш атамыз:

Айналып әрқашан сен тұмарыма,
Өзіңнің қанбай жүрмін құмарыңа.
Құйтымдай қасиетім болса егер,
Ауылдың топырағынан жұғады да, - деп жеткізсе,

Ақжол атамыз:
Өзіңде тұмарладым ой тұмарын,
Сары майдай тәп-тәтті Майбұлағым.
Өзіңнің жағаңдағы саздау жерде
Бабаларым үйреткен тай-құнанын,- деп, жырға қосады.

Кемер белбеу-белдің сәнін келтірсе, кемел жігіт-елдің сәнін келтіреді. Туған өлкемнің сәні мен салтанатын келтірген Қуаныш Төлеметұлы - мемлекет және қоғам қайраткері, ҚР Парламентінің депутаты, Қазақстан жазушылар одағының мүшесі, ақын.

Ақжол Асқарұлы - ҚР-на еңбегі сіңген қызметкер, Қазақстан спортына еңбегі сіңген қайраткер, ҚР-на еңбегі сіңген жаттықтырушы, бокстан спорт шебері, профессор. 1996-2000 жылдар аралығында аты шыққан Халықаралық спорт шеберлері Бекзат Саттарханов, Қанат Шағатаев, Нұран Сыманов сынды шәкірттерді жаттықтырып шығарған.

Менің туған өлкемнен Қазақстанға белгілі өнер қайраткерлері де шыққан. Солардың бірі Қазақстан Республикасының еңбек сіңірген әртісі, республикалық Шәмші Қалдаяқов атындағы өнер байқауының лауреаты, Қазақстан және Қырғызстан республикалары арасындағы еларалық өнер байқауының жүлдегері - Гүлнәр Сиқымбаева.

Майбұлақтың перзенті, белгілі майталман әртіс, 1993 жылы Қазақстан Республикасының халық әртісі атағын алған, екі жүзден аса образды сомдаған-Ақсақал Қалмырзаев.

Бала кезден өлеңге бейім болған, ҚР-на танымал ақын атамыз - Сатыбалды Дулати. Сатыбалды Қосалыұлы бірнеше жыр жинақтар жазып, халқына тарту еткен.

Бұл кісілердің елге, ауылымызға жасаған еңбектері өте көп. Тіпті, біз ауылымызды таныстырғанда «Қуаныш Төлеметовтің туған жері» деген тіркестерді қолданып, масаттана айтамыз.

Ауылымыздағы «Майбұлақ» қақпасын, Нұрата кесенесін, Ұлы Отан соғысы ардагерлеріне арналған ескерткішті, ауылдағы «Анаға тағзым» мүсінін - бәрін де Ақжол мен Қуаныш аталарым жасаған.

Міне, осындай кісілерді мен «Ауылымыздың ақсақал батырлары» дер едім. Біз, сол ата-апалардың соңынан келе жатқан жас өскелең ұрпақ «Ел мақтаныштарын» , «Ел батырларын» ешқашан ұмытпаймыз.

Өлмейді ісі мәңгілік,
Өшпейді абзал есімдер.
Ұрпаққа жетіп мәңгілік
Кетпейді естен асыл ер, - деп ақ жалын ақын Жұбан Молдағалиев жырлағандай, аталарымыздың әрбір жүріп өткен жолы - біз үшін үлгі, шежіре, тағдыры - тарих деп есептеймін.

«Елім» деген ерлердің есімі еш уақытта елеусіз қалмайтыны ақиқат. Халық мұндай азаматтарын жыр-аңызға айналдырып, елі үшін жасаған еңбектері мен ерліктерін жан жүрегінде сақтайды.

Үміт ҮСІПХАН
Майбұлақ жалпы орта мектебінің
7-сынып оқушысы
ОҚО
Төлеби ауданы
Майбұлақ ауылы.
Жетекшісі: Салтанат Жолдыбаева

Рейтинг	Регион	Аким
219022	Алматинская область
146708	Туркестанская область
108999	Восточно-Казахстанская область

Рейтинг	Регион	Аким
339	Алматинская область
195	Туркестанская область
180	Северо-Казахстанская область

« Июль 2025 »
Пн	Вт	Ср	Чт	Пт	Сб	Вс
	1	2	3	4	5	6
7	8	9	10	11	12	13
14	15	16	17	18	19	20
21	22	23	24	25	26	27
28	29	30	31

Мы в соц сетях:

Майбұлақтан шыққан тарландар

Поделиться материалом

Другие материалы по теме

По читаемости

По материалам