«БАТЫРЛАРДЫ» БАСЫП КЕТПЕЙІК

Өткенде Қабанбай батыр көшесі бойында кетіп бара жатып, байқамай «батырды» басып кеттім. Анығында, менің басқаным кәріз жүйесінің қақпағы екен.

aikyn.kz

Креативті жарнамашылардың мына «жаңалығын» қараңызшы, кәріз жүйесінің темір қақпағын Қабанбайдың қалқанына айналдырып жіберіпті. Иә, қақпақты қалқанға ұқсатып, оны Қабанбайға ұстатып қойыпты. Көшемен әрлі-берлі өткен жұрт батырымызды аяққа таптап өтіп жатыр. Тіпті кейбіреулері түкіріп, темекі тұқылын, шемішке қабығын лақтырып өтуде.

Мұндайда қалай намыстанбайсың? Қалай делебең қозбайды? Бір ғана Қабанбай көшесінде ғана ма десек, Қарасай, Бөгенбай, Наурызбай батыр көшелеріндегі жағдай да осыған ұқсас екен. Бөгенбай батыр көшесіндегі кәріз қақпағында Бөгенбайдың, Қарасай көшесінде Қарасайдың, Наурызбай көшесінде Наурызбайдың тротуардағы бейнесі бар екен. Суреттердің бәрі де трафареттік тәсілмен салыныпты. Батырлардың астарында – тұлпар, қолдарында – қақпақ. Қилы заманда жаугершілік жойқынына тойтарыс беріп, қазақ даласын қалқанымен жаудан қорғап қалған батырларды осылай мазақтайтындай не күн туды? Әсіресе, биылғыдай Қазақ хандығының 550 жылдығын тойлаймыз деп, бел сыбанған кезде батырлар бейнесінің табан астында тапталып жатқаны қалай?

Жарнамашылардың шығарып жүрген креатив дегені бір бәле болды бізге. Өздеріне салсаң, «қазақтың батырларын жарнамалап тұрмыз, бұған жаңашыл көзқараспен қарау керек» деп бет бақтырмайды. Құдай-ау, батырларға не жарнама керек? Қазір қай қазақтан сұрасаң да Қабанбай мен Бөгенбайдың кім екенін тақылдап айтып бермей ме? Атын білгенін былай тұрсын, жасаған ерлігін, атқарған қызметін де жатқа соғады.

Әлде, бұл көшемен жүрген адам жерге қарап, бұл кімнің жері, яғни кімнің атындағы көше екенін көріп жүрсін деді ме екен? Көше атауы ғимараттардың қабырғасында-ақ жазылып тұр емес пе, тротуарға жазудың не керегі бар?

Ал жаңаша көзқарас дегенді қалай түсінеміз, жаңаша көзқараспен қарау керек екен деп басты құндылықтарымыздың бәрін жоққа шығаруымыз керек пе сонда? Креативтің де көкесін көріп жүрміз, ал мынау ешқандай да креатив емес, қорлау, мазақтау. Осыны жасаған «Guerilla» жарнама агенттігінің батырларымызды лас-лас аяқтардың астында «таптатудан» басқа ойы болмаған сияқты. Оларға батырлардың біз үшін ұлттық намысымыз екені бес тиын.

Кезінде Голливудтағы «Даңқ аллеясындағы» тротуарға танымал адамдардың есімдері жазылғанын білесіздер. Атақты жұлдыздардың бәрінің жұлдызы тротуар бойында жайрап жатыр. Тек даңқты боксшы Мұхаммед Әлидің ғана даңқ жұлдызы қабырғада ілініп тұр. Мұхаммед Әли: «Менің есімім – барша мұсылмандардың соңғы пайғамбарының құрметіне қойылған. Сондықтан мұндай құрметті есімді қабырғаға қадауды талап етемін» деген болатын. Сол талабы орындалды. Ал біз... Қазақ хандығын, тұтас қазақ ұлтын ақ білектің күшімен, ақ найзаның ұшымен қызғыштай қорғаған батырларымызды «басып» жүрміз. Соған қарағанда, ұлттық рух, қазақы патриотизмнің не екенін ұмыта бастаған сияқтымыз. Бүгін бабаларымызды мазақтасақ, ертең өзіміз елге таба болмаймыз ба?

«Guerilla» жарнама агенттігі бұл акцияның тақырыбын «Біз оларды ұмытпаймыз, себебі олар соған лайықты» деп қойыпты. Батырлар табанда тапталуға лайықты болғаны ма? Бұл деген барып бұрған бассыздық емес пе? Тіпті агенттік осы акцияны желеулетіп «Батырлар» деген жобамен жарнама агенттіктері арасында ұйымдастырылған байқаудың да жүлдегері болыпты. Не үшін жүлде берілген, бабаларды, батырларды мансұқтағаны үшін бе?

Бұған Алматы қаласының әкімдігі, қаланың көркіне жауап беретін уәкілетті органдар неге мән бермеді екен. Үстін сылап, тазалап тастаса болмай ма? Рас, суреттер уақыт өткен сайын өшіп, жоғалып бара жатыр. Бірақ дер кезінде өшіріп тастаса, бұдан да жақсы болар ма еді.

Биыл біздің ел Қазақ хандығының 550 жылдығын тойлағалы отыр. Тіпті той басталып кетті деуге болады. Қазақтың хандары мен сұлтандарын, батырлары мен билерін ұлықтаған шаралар әр аймақта өтуде. Осындай думанды кезде батырға көрсетілер құрмет айрықша болуы керек емес пе еді? Оларды ұлықтап, абыройларын аспандатуға тиісті емес пе едік?

Рейтинг	Регион	Аким
219022	Алматинская область
146708	Туркестанская область
108999	Восточно-Казахстанская область

Рейтинг	Регион	Аким
339	Алматинская область
195	Туркестанская область
180	Северо-Казахстанская область

« Апрель 2025 »
Пн	Вт	Ср	Чт	Пт	Сб	Вс
	1	2	3	4	5	6
7	8	9	10	11	12	13
14	15	16	17	18	19	20
21	22	23	24	25	26	27
28	29	30

Мы в соц сетях:

Поделиться материалом

Другие материалы по теме

По читаемости

По материалам