Шымкентте дәрігерлер өмірін аман алып қалған үшемдердің көпбалалы анасын баспанасынан қуып жатыр

Шымкентте биылғы жылы дүниеге келген алғашқы үшемдерді дәрігерлердің аман алып қалғаны отандық БАҚ-та жазылған еді. Бүгінде бұл отбасы далада қалуы мүмкін. Үш нәрестесімен перзентханадан шыққан әйел бұған дейін тұрып жатқан жеркепеге қайтып келген. Ол жерде перзенттері ауырып қалып, қайта ауруханаға түсіпті. Ендігі пәтер иесі баспанадан шығарғалы отыр екен. Бұл туралы Otyrar.kz хабарлайды.

Қазіргі уақытта Фозила Досметова дүниеге келгеніне екі ай болған үшемдерімен ауруханада жатыр. Оған тұрған үйлерінің санитарлық талаптарға сай келмеуі себеп болыпты. Бүгінде үшемдердің жағдайы жақсы. Алайда әйелдің қалған үш баласы қараусыз қалған.

«Ешқандай туысқаным жоқ, бір ғана нағашым бар еді, ол да болса өз күніңді өзің көр деп үйінен қуып жіберді. Содан бері пәтерден-пәтерге көшіп жүрмін. Балаларым үшін дәретхана да жудым, ыдыс та жудым – барлығын істедім. Енді қазір жұмыс істей алмаймын ғой. Балаларымнан обал. Қайда барамыз, не істейміз білмеймін. Елден көмек сұраймын, баспанам болса, алты баламның басын біріктірсем деймін. Үлкен үш баламның екеуі жалдап жатқан уақытша баспанада, бір қызымды қайтыс болған күйеуімнің анасының үйіне уақытша апарып тастадым. Сол балаларымды көрмегеніме де қанша уақыт болды», – дейді көпбалалы ана.

Анасы үшемдерімен ауруханада жатқанда, қалған кәмелет жасқа толмаған үш баласы қараусыз қалған. Олардың ішетін тамағы, киетін киімі жоқ. Өз беттерінше күн көріп отыр. Бүгінде олар сабаққа бару үшін де қиналады. Себебі оқып жатқан мектептері Сайрам ауданында орналасқан.

«Мектебімізге жету үшін таңғы сағат 6-да жолға шығамыз, бірінші 109-бен қырғы базарына, одан соң 32-ге мініп барамыз. Бірінші сабаққа үлгермейміз. Осы қаладағы мектепке ауысайын десек, бізді тұрақты тіркеулерің жоқ деп алмай жатыр. Қатты қиналып кеттік, інім екеуімізге күн сайын 1000 теңгедей кетеді, оны анамыздың құрбысы беріп тұр әзірге. Биыл мектеп бітіремін, тестілеуге дайындалуым керек, бірақ менде қазір ешқандай мүмкіндік жоқ, болашағыма сенбеймін», – дейді Фозиланың қызы Гузаль.

Фозиланың отбасы бір бөлмелі жалдамалы пәтерде тұрады. Іші суық болғандықтан, балалар қалың киініп жүреді. Пәтер иесі жылытқыш қосуға рұқсат бермейді екен.

Ал балалалар үшін уайымдап, оларға барынша көмектесіп жүрген – Фозиланың құрбысы Ұлболсын Абдуалиева. Ол құрбысының үйде қалған балаларына тамақ тасып, жолдарының шығынын өзі өтеуде. Алайда бір өзінің шамасы жетпей, қоғам белсенділерінен көмек сұрапты. Айтуынша, қазіргі уақытта пәтер иесі Фозиладан екі күннің ішінде үйді босатуды талап етіп отыр.

«Осы үйге де зар болып отырмыз. Үй иесі Астанада өртеніп кеткен 5 сәбидің оқиғасынан кйін мойныма балалар үшін жауапкершілік алмаймын, үйді босатыңдар деп отыр. Қазір күн суық, балалар қайда баратынын білмейді. Мен өзім пәтер жалдап тұрамын, күйеуім, енем, балаларым бар, бұл балаларды апаратын жерім де жоқ. Осы кезге дейін пәтерақысын да төлеп келдім, бірақ менің де жағдайым керемет емес. Сол үшін көмек сұрап отырмыз. Осы балалар үшін барлығы», – дейді Ұлболсын Абдуалиева.

Көпбалалы ананың жағдайынан хабардар болған қоғам белсендісі Нұрбол Нұрханов оған көмекке келіпті. Алайда ол Фозиланың шешілмеген мәселелері көп екенін анықтаған. Жалғызбасты ананың тіркеуі жоқ болғандықтан, мемлекеттік жәрдемақыларды ала алмаған.

«Алдында үш бала еді, үш балаға ешқандай көмек көрсетілмейді. Бірден 6 бала болды да, қиналып қалған жәйі бар. Қазір Фозиланың мемлекет тарапынан берілетін көмекке қол жеткізуі үшін тиісті құжаттарды дайындап жатырмыз, бірақ оның барлығы уақытты талап етеді. Бір ғана банктен шот аштыруға үш күн кетеді. Ал бұл отбасының күтетін уақыты жоқ. Екі күнде үйден шық деп отыр оларға. Сондықтан қоғам болып көмектесейік деп, халықтың назарын аударайық деп жүрміз. Солай көмектеспесек, басқа амалымыз жоқ», – дейді қоғам белсендісі Нұрбол Нұрханов.

Жалғызбасты ананың қиындығы туралы естіген қалалық жұмыспен қамту және әлеуметтік қорғау басқармасындағылар оның отбасына азық-түлік әкеп беріп, құжат мәселесін шешіп, мемлекеттен берілетін қаржылай көмекті реттестіруге уәде берді.

«Көмектесемін деп жүрген өкілі бізге келсе біз барынша көмектесеміз. Құжаттарды тезірек жинақтауға да қол ұшын береміз. Көпбалалы анаға мемлекет тарапынан көрсетілетін көмектер бар», – дейді қалалық жұмыспен қамту және әлеуметтік қорғау басқармасының аз қамтылған отбасылармен, зейнеткерлермен, ардагерлермен жұмыс жүргізу бөлімінің басшысы Ұлдана Бекбау.

Сондай-ақ, «Ізлікте жарысайық» қайырымдылық қорының жанашырлары балаларға жылы киім әкеп берді.

Десе де көпбалалы ананың баспана мәселесі әлі де шешімін таппады. Егер бұл мәселе шешілмесе, ол алты баласымен бірге екі күннен кейін далада қалуы мүмкін.

Егер Фозила Досметованың отбасына көмектескіңіз келсе, 87784351957 нөміріне хабарласа аласыз.

Рейтинг	Регион	Аким
219022	Алматинская область
146708	Туркестанская область
108999	Восточно-Казахстанская область

Рейтинг	Регион	Аким
339	Алматинская область
195	Туркестанская область
180	Северо-Казахстанская область

« Июнь 2025 »
Пн	Вт	Ср	Чт	Пт	Сб	Вс
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30

Мы в соц сетях:

Шымкентте дәрігерлер өмірін аман алып қалған үшемдердің көпбалалы анасын баспанасынан қуып жатыр

Поделиться материалом

Другие материалы по теме

По читаемости

По материалам