Ақсақал жүрген жер – береке » Матрица.kz - Информационно-аналитический портал

Ақсақал жүрген жер – береке

Қазақ ежелден-ақ қартын қазынаға бағалаған. Көпті көрген, көңілі дария сол қарияларымыз қиын сәттерде ақыл-кеңесін беріп, жүрекжарды ақ батасымен ұлтымызды ұйытып, ауызбіршілігін бекемдеп отырған. Осындай қазыналы қарттардың қатарында өзімнің атам, Алатау бөктері, Қосағаш ауылында 1928 жылы дүниеге келген, бітім-болмысымен, өзіндік іс-әрекеттерімен көпке үлгі болып, ақыл-өсиетін айтып жүрген ауыл қариясы - Ілес Дүйсенбекұлы да бар.

Бұл кісіні біздің ауылда еңбектеген баладан, еңкейген кәрісіне дейін біледі. Ілес ата туралы әңгімелер ауыл ішінде көптеп айтылып, оның ауыл тұрмысын жақсартып, дамытудағы ерен еңбегін ауылдың үлкен-кішісі қызыға әңгімелесіп отырады.

Әсіресе, менің көкейімде қалғаны - атамның алыста қалған балалық шағын соғыс өрті жалмағаны, ер-азаматтар майданға кеткенде, он үш жастағы қаршадай баланың аналарға қолқанат болып, қос айдап, масақ тергені, аш құрсақ жүріп, тылдағы осындай еңбектерімен ұлы жеңіске үлес қосқаны.

Одан соң мұғалімдік курс оқып, кейінірек білімін жоғарылатып, ауылдағы мектепте мұғалім бола жүріп, Қызылүңгір ауылдық кеңесінде хатшы болып та жұмыс жүргізді.

Ел үшін аянбай еңбек еткенде ғана ел алғысын алатынымызды айтып, өз балаларын ғана емес, бауырларын да, ауыл адамдарын да еңбек сүйгіштікке баулыды: бау-бақша егіп, мал басын көбейтіп, тұрмысын жақсартуға өзі бастап мұрындық болды.

Қырық төрт жылдық ұстаздық еңбек жолында тек шәкірттерге білім мен тәрбие беріп қоймай, директордың оқу-тәрбие ісі жөніндегі орынбасары қызметінде ұжымындағы талай жас мамандардың қанатын қатайтып, шеберлігін шыңдады, елдің болашағы - баланы тәрбиелеудегі өмірлік тәжірибесімен бөлісті.

Жоғары санаттағы ұстаз деңгейіне көтерілуіне ықпал етті. Атамның өмірі мен еңбек жолы әркез қызығушылығымды туғызып, өзі жайында аталып жүрген ел ауызындағы әңгімелерді өз аузынан есту үшін үнемі сұхбаттасып отыруды дағдыға айналдырып алдым.

Осы жылдың ақпан айында тоқсанға келген атам немерелері мен шөберелерін қасына алып, басынан өткерген оқиғаларын айтып отырады. Бұл атамның күнделікті әдетіне айналған. Өзі әлі тың. Жаз, күз айларында баудағы шөптерді орып, малға қарайды.

Есімінің не себепті Ілес қойылғанын сұраған маған анасы Мырзайымның қанша құрсақ көтергенімен, еркек кіндіктен ешкімнің тұрмай бақилық болып кеткендігінен, өзін құдайдан аман қалуын тілеп, қарақұсты ырым етіп сәбимен күтіп-баптап, бала жасқа толғанда өзен аңғарына апарып, құсты ұшырып, барлық жамандық атаулы осы құспен бірге ұшып кетсін, ажал адассын, бала ата-анасының артынан ілессін деп қойғандығымен түсіндірді.

- Апаң Бақыткүл екеуміз 1954 жылы шаңырақ көтердік. Құдайға шүкір, он бір перзент сүйдік. Алты ұлды, бес қызды тәрбиелеп өсірдік. Балаларымыз азамат болып, немере-шөберелеріміздің қызығын көріп отырмыз. Қиындықтың бәрі де арттта қалды. Бүгінгі ұрпақтың бақытты өмір кешіп отырғанына ризамын, бақытқа еңбек арқылы ғана қол жеткізе аласың, балам,- дейді атам.

Өлшеусіз еңбегінің, адалдығының қайтарымы шығар, бір ұлы биология, бір қызы филология ғылымдарының кандитаты, өзге балалары да отбасының ұйытқысы атанып, ел үшін еңбек етуде. Атам - менің ғана емес, ауылдың атасы, қадірменді қариясы, ақыл сұрар ақылшысы.

Көнекөз қариялардың ортамызды толтырып жүргеніне не жетсін. Еңбек ардагері Ілес атамның халыққа сіңген еңбегін бағалау жолында алған медальдары мен төсбелгілері аз емес.

КСРО жоғарғы кеңес төралқасының шешімімен берілген «Ұлы Отан соғысы жылдарында еткен ерен еңбегі үшін» және В.И.Лениннің туғанына 100 жыл толуына орай мерекелік медальдары және «Қазақ КСР Халық ағарту ісінің озық қызметкері», «Социалистік жарыстың жеңімпазы» төсбелгілерінің орны бөлек.

Мұнан басқа Ұлы Жеңістің 30, 40, 50, 55, 60, 65 жылдықтарына орай марапатталған мерекелік медальдары және бар.

Халыққа жасаған қызметі лайықты бағаланып жатса, бұл қарапайым еңбек адамы үшін үлкен қуаныш. Менің де еңбегі еленіп, ел алдында биік бедел мен асқақ абыройға бөленген, өмірдің бақытын еңбек жолынан тапқан пейілі кең атама ұқсағым келеді.

Қарттарын құрмет тұтқан ел ата дәстүрі мен салтын, ұлттық мінезін, тілін, дінін көздің қарашығындай сақтап, бүгінгі және болашақ ұрпағына өнегелі тәрбие мен терең білім бере алатыны сөзсіз.

Нұрдәулет ЛЕС
10-сынып оқушысы
Аудандық мамандандырылған
мектеп-интернат
Оңтүстік Қазақстан облысы
Төлеби ауданы
Жетекшісі: Мейрамкүл Мұсаева

Рейтинг	Регион	Аким
219022	Алматинская область
146708	Туркестанская область
108999	Восточно-Казахстанская область

Рейтинг	Регион	Аким
339	Алматинская область
195	Туркестанская область
180	Северо-Казахстанская область

« Июнь 2025 »
Пн	Вт	Ср	Чт	Пт	Сб	Вс
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30

Мы в соц сетях:

Ақсақал жүрген жер – береке

Поделиться материалом

Другие материалы по теме

По читаемости

По материалам