Мектептегі ақша жинау, пара алу қашан жойылады?

Оңтүстікте мектеп директорларын конкурспен тағайындауда талап күшейтіледі. Директорлық лауазымға тағайындалғысы келген азаматтың біліктілігі мен білімін былай қойғанда ұжыммен тіл табыса алатын, заңды да сыйлайтын, әдептен де аттамайтын адал азамат болуы керек. Кеше мемлекеттік қызмет істері және сыбайлас жемқорлыққа қарсы іс-қимыл Агенттігінің Оңтүстік Қазақстан облысы бойынша департаменті, Сыбайлас жемқорлыққа қарсы іс-қимыл Ұлттық бюросының облыстық департаменті және облыстық білім басқармасының ұйымдастыруымен өткен жиында осындай мәләметтер айтылды.

Іс-шараға облыс әкімінің орынбасары Ұласбек Сәдібеков, білім беру ұйымдарының басшылары, сыбайлас жемқорлық тәуекелдерін сыртқы талдау мен бағалауды іске асыру жөніндегі Арнайы мониторингтік топ мүшелері, кәсіподақ және халыққа қызмет көрсету орталығының өкілдері қатысты. Сонымен қатар, бейнеконференцбайланыс режимінде облыстың аудан,қала әкімдері мен білім бөлімдері, мектеп директорлары қосылды. Кездесу барысында заңсыз ақша жинау, сондай-ақ мектептерде жұмысқа орналасу үшін пара беру мәселелері талқыланды.

Жиында жасалған баяндамаға жүгінсек бұған дейін аудан, қалаларда директорлық бос орынға жарияланған конкурсқа қатысу үшін үміткерден облыстық білім басқармасы тарапынан ұсыным талап етілген. Алайда білім басқармасында бұл ұсынымды берудің тәртібі айқындалмаған. Оны басқармадағы бір қызметкер беріп келген.

Былтыр Ордабасы ауданында бір әдіскер облыстық білім басқармасының ұсынымымен конкурсқа қатысып, мектеп директоры болып тағайындалып кеткен. Кейіннен тексеру барысында оның директор болуға еңбек өтілінің жетпейтіні анықталып, қайтадан қызметінен алынған. «Рейтинг» газетінде біз осы тәртіптік істің әдеп кеңесінде қаралып, облыстық білім басқармасының басшыларының жауапкершілікке тартылғанын жазған болатынбыз. Осындай оқиғалардан кейін білім басқармасы ұсыным берудің тәртібін белгілеп, директорлыққа үміткерлерге қойылатын талапты күшейтіпті.

Үміткерлер арнайы комиссияның әңгімелесуінен өтеді, тест тапсырады. Департаменттің ұсыныстары ескеріле отырып, Мемлекеттік орта білім беру ұйымдарының басшыларын конкурстық тағайындау қағидасы жаңа редакцияда бекітіліп, 2018 жылдың 2 ақпанында күшіне енген. Сондай-ақ, облыстық білім басқармасында білім беру мекемелерінің басшыларына кандидатураларды келісу жөніндегі арнайы комиссия құрылған.

Оңтүстікте былтырдың өзінде пара алу үстінде бірнеше директор қолға түссе, жыл басынан бергі екі айда 2 директор ұсталған. Беріліп жатқан пара жұмысқа қабылдауға, мектептің асханасын жалға алуға қатысты. Тіпті бала асырап алумен де байланысты оқиғалар бар көрінеді. Осы жуырда ғана Мақтаралда мектеп директоры орынбасарымен бірге жаңадан салынған қосымша ғимараттан кабинет алып беру үшін бопсалау жолымен пара алған көрінеді. Бірақ Ұлттық Бюро өкілдері директор мен «завучтың» нақты кімді бопсалағанын ашып айтпады.

Ал балабақшаларда «Балапан» бағдарламасы бойынша бөлінген қаржыларды игеруге қатысты қылмыстық істер Оңтүстікте соңғы жылдары көбейе бастаған. Былтыр осы бойынша 9 ауыл әкімі қылмыстық жауапқа тартылған. Жыл басынан бері департаментке білім саласы бойынша 25 арыз түссе, солардың дені пара алуға қатысты. Ұлттық бюроның өкілдері «білім саласын парақорлықтан тазарту, мектептегі мәселелерді ақша арқылы шешуден арылту өте қиын шаруа» дегенді айтты.

Жиын барысында директорларды парамен ұстау сәтінен түсірілген оперативті видеолар көрсетілді. Ұлттық бюроның өкілдері «Мұны сіздерге қорқыту үшін көрсетіп жатқан жоқпыз» дегенді айтты. Дегенмен директор деген дардай аты бар ұстаздың қолына кісен салуды, ұсталғандардың кейбірінің «ағай, кешіріңізші» деп еңіреп жылағанын көру кім-кімге де оңай болмағаны анық.

Облыстық білім басқармасының басшысы Исатай Сағындықовтың айтуынша, білім саласында қазір пара ҰБТ-ның кезінде және мектепке маман қабылдауда сұралады екен. Осы келеңсіздіктің алдын алу үшін білім басқармасы түлектерді тестке тегін дайындататын арнайы сайт ашыпты. Ал жұмысқа маман қабылдауда «бармақ басты, көзі қыстының» жолын кесу үшін мектептерді толығымен цифрландыру басталыпты. Мұның қандай нәтиже беретіні уақыттың еншісінде.

Айтқандай, жиында Ұлттық бюроның өкілдері білім мекемелерінің басшыларына сыйлық алудан сақ болуды ескертті.

-Мектептің директоры лауазымды мемлекеттік қызметкерлерге теңестірілген. Сондықтан ондай қызметкерлерге мереке күндері ата-аналардан, оқушылардан, әріптестерінен сыйлық алуына тыйым салынған. Егер сыйлық белгісіз біреуден келіп түскен болса, онда оны дереу Мүлікті жекешелендіру комитетінің ОҚО бойынша департаментіне жеті күннің ішінде апарып өткізуі тиіс. Сондай-ақ, ата-аналардан ақша жинауға да болмайды. Білім бөлімінің басшылары осының алдын алудың қажетті шараларының бәрін жасауы керек. Егер ата-аналардан ақша жинау орын алса, онда білім бөлімінің басшысының мәселесі әдеп кеңесінде қаралады,-деді Ұлттық бюроның өкілдері.

Құзырлы орган өкілдерінің директорларға мұндай ескертуді 8 Наурыз бен Ұлыстың Ұлы күнінің алдында жасауы да бекер емес сияқты.

«Рейтинг» газеті, 1 наурыз, 2018 ж

Рейтинг	Регион	Аким
219022	Алматинская область
146708	Туркестанская область
108999	Восточно-Казахстанская область

Рейтинг	Регион	Аким
339	Алматинская область
195	Туркестанская область
180	Северо-Казахстанская область

« Февраль 2026 »
Пн	Вт	Ср	Чт	Пт	Сб	Вс
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28

Мы в соц сетях:

Мектептегі ақша жинау, пара алу қашан жойылады?

Поделиться материалом

Другие материалы по теме

По читаемости

По материалам