ДЕПУТАТТАРДЫҢ «АСТЫНАН СУ ШЫҚПАЙДЫ», ЕСЕСІНЕ …

Депутаттардың айлығы елді дүрліктіріп жіберді. Әлбетте, басыбайлы баспанасы жоқ, бір «жапырақ» жері жоқ, жалақылы жұмысы жоқ, тойып ішер тамағы жоқ, тон тұрмақ, киерге көйлегі жоқ, «жеті жоқтың» күнін кешіп жатқан кедейі көп халық ашынбай қайтсін?

«Итке сүйек тастағандай» қылып, шиеттей бала-шағасына 9940 теңге жәрдемақы алатын байғұстар байлардың 900 мың теңгелік айлығын қызғанбай қайтсін? Қып-қызыл капитализм, иә!

Осы «халықаралық стандарт» деген Құдайдың «соры» болды. Кедендік одаққа кіреміз деп баға мен заңның барлығын дерлік Ресейдің стандартына сәйкестендірдік. Одан бөлек халықаралық талапқа сай ратификацияланған құжаттардың есебіне жету қиын. Баяғыда ауылдың қатындары ұрысып жатса, «-Не болды, ей, бөрінің артындай шулап» - деп әжелеріміз тиып тастаушы еді. Біздің депутаттар тура солар сықылды көрінеді. Улап-шулап алады да, мақұлдап жібере салады. Әлгі, салықшыл және айыппұлшыл заңдар соның «нәтижесі» ғой.

Айлық мәселесінде де халықаралық тәжірибеге сүйенеді-міс. Украинаның Жоғарғы РАДА депутаттарына айына – 40 мың гривна төленсе, ДУМА депутаттарының негізгі айлығы – 80 мың рубль екен. Біздің депутаттардың алатыны ағылшындық әріптестерінің еңбекақысынан да асып кетіпті. Осыған да қанағат қыла алмай, Премьер-министрдің айлығын көксейтіндер табылды. Не үшін? Қол көтеріп, бас изегендері үшін бе?

Бұл Парламенттен қаймана қазаққа қайран да, қайыр да болмай тұр. Не тіл үшін тебіренбейді, не жер үшін еміренбейді. Ұлттық идеология ұмыт қалды. Ал, депутаттардың бар арманы - Астананың атын ауыстыру сыңайлы. Кереку мен Қызылжардың атын қайтаруға қай аталарынан именетінін қайдам, үндемейді, әйтеуір.

Ұлт деп тұрғаным – ұрпақ. Оқушылардың ойы оқуда емес, мектептің айналасындағы ойынханаларда. Тіпті, тұла бойымен еніп кетіп жатқандары жетерлік. Букмекерлік компаниялар мен интернет клубтарының атын жамылған ойынханаларды жабуды ойламайды.

Ұлт деп тұрғаным – ҰБТ-дан төмендеп кеткен қазақтың тілі... Әйтеуір, «Әліппе» үшін тілеулес болған Бекболат Тілеуханға рахмет. Ол кісінің айлығы өссе де түсінуге болады, бала-шағасы көп дегендей...

Ал, Азат Перуашевтың қай дегені, бұл. Өзі әжетханасы мен асханасы жоқ үйде тұра алады ма екен? Адам бірнәрсе демес бұрын ойша болса да өзінен өткізіп көруі керек қой.

«Біреудің жоғын біреу өлең айтып жүріп іздейді» дегенді депутаттар дәлелдеумен келеді, негізі. Террористер мен экстремистер құрықтала қалатындай, үйің бар ма, жоқ па, жаппай тіркелуді міндеттеп қойды. Міндеттеумен шектелмей, айыппұл салатын болды. Баспананың жайы жұрттың жанайқайы еді. Буынсыз жерге пышақ ұрды, қысқасы. Ал, Перуашевтың мұнысы ашыған жараға тұз себу ме, қалай?

Мәжілісте қазір кім жоқ? Алдыңғы шақырылымдағы сөзі түзу депутаттардан санаулысы қалды. Осы жолы бас партия қарашаны қатырды. Сайлауалды тізімге кіл жақсыларды қосып дауыс жинап алды да, жеме-жемге келгенде бәрін «лақтырып» кетті.

Халықтың қалауымен сайланбай, Мәжіліске жайғасқандардың «астынан су шықпас», енді. Есесіне, қара жұмыстағы аналар «астынан су кеткенше» бейнет кешеді. Мәжілістің мінберіне шықсам, 63 тұрмақ 83 жасқа дейін созып алар ма едім, кім білсін? Бір анығы, 63 жасқа жеткенше, өндірістегі кемпірдің белі бүгіліп, сүйегі мүжіліп кетеді. Ресейдің әйелдері қандай бақытты, 55 жаста зейнетке шығады. Әдемі қартаяды.

Зейнетақы қорындағы ақшамызды жан-жақтан «жұлмалап» жатыр. Ал, депутаттар өре түрегелудің орнына басын бұғып отыр. Жұрттың депутаттарына қарасаң, әуесің кетеді. Елі мен жері үшін үкіметін де аямайды. Ал, біздікілер Елбасыға дат айтпақ тұрмақ, дұрыс кеңес беруге жарамайды. Президенттің алдынан қанша заң мен арзан ұсыныстары кері қайтты екен...?

«Үй» деді, «бүй» деді, БАҚтың да, бұқараның да аузын буып бітті, ақыры, жақ аштырмас заң жасақтап. «Халықтың көзі, құлағы һәм тілі» саналатын журналистер айтпаса, өздерін «халықтың қалаулысымын» деп қалай атайды, бұлар?

Бәрі емес қой, әрине. Арасында көпшілікке қадірлі қалаулыларымыз да бар. Десе де, жасыратыны жоқ, жалпы Парламентке деген ел сеніміне селкеу түскелі қашан. Сүйкімін кетіріп жатқан депутаттардың өздері.

«Далақбайдың дамбалы далақтап жүріп тозыпты» деген. Далақбайдай депутаттар қазаққа арман ғой. Ел мен жер, тіл мен дін үшін табанын тоздыратындардан миллионды да аямассың. Ал, қоғамда әлеуметтік тепе-теңдік сақталмай тұрғанда, бір бүйірден дағдарыс қыспаққа алғанда, оны қойшы, ең құнды байлығымыз, атамекен жеріміз сынаққа түсіп жатқанда «ләм» демеген «көкебастарға» неңді қиясың? Қалай сенесің?

Ал, біз парламенттік басқаруға өтеміз деп қоямыз, тағы.

Рейтинг	Регион	Аким
219022	Алматинская область
146708	Туркестанская область
108999	Восточно-Казахстанская область

Рейтинг	Регион	Аким
339	Алматинская область
195	Туркестанская область
180	Северо-Казахстанская область

« Октябрь 2025 »
Пн	Вт	Ср	Чт	Пт	Сб	Вс
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31

Мы в соц сетях:

ДЕПУТАТТАРДЫ&#1186; «АСТЫНАН СУ ШЫ&#1178;ПАЙДЫ», ЕСЕСІНЕ …

Поделиться материалом

Другие материалы по теме

По читаемости

По материалам

ДЕПУТАТТАРДЫҢ «АСТЫНАН СУ ШЫҚПАЙДЫ», ЕСЕСІНЕ …