Қазақстанда «Нұр-Шах» отандық бренді туралы білмейтін жан кемде кем. Ұлттық нақыштағы, қазақы мәнердегі және сән - салтанаты жарасқан заманауи үлгідегі киімдерді ұсынып отырған «Нұр-Шах» сән үйі – бүгінде елімізге ғана емес, бүкіл әлемге кеңінен танымал. «Нұр-Шах» десе бірден маңғыстаулық дизайнер Нұржамал Нұрпейісованың есімі қатар аталады. Осы сән үйінің негізін қалаушы және идеялық авторы Нұржамал Нұрпейісова 2001 жылы, осыдан аттай 15 жыл бұрын Ақтау қаласында өзінің кішігірім кәсібін ашып, үлкен еңбек пен жігердің арқасында биік белестерге жетіп, әлемдік аренада еліміздің атын шығарып, ұлттық киімдерімізді насихаттап, ұлттық құндылықтарымызды сақтауға мол үлесін қосып жүрген мықты кәсіпкерге айналды. Оның үстіне «Нұр - Шах» – бүгінде «Бизнестің Жол картасы - 2020» бағдарламасының ең табысты, ең жарқын жобаларының қатарында.
«Бала күнімде анамның үстіндегі оюлы бешпет, камзолдарды көріп, «Өскен соң, міндетті түрде ұлттық киімдерді тігемін» - деп армандайтынмын. Сол арманым адастырмады», - деп бастады әңгімесін «Нұр-Шах» сән үйінің директоры Нұржамал Нұрпейісованың өзі.
Тігу өнерінің қыр - сырын 13 жасар оқушы Нұржамал мектептегі еңбек сабағында меңгере бастапты. 15 жасында алғашқы көйлегін апасына арнап тігіп береді. Бірақ тігуден бұрын үнемі ойына жаңа идеялар, образдар келетін, киімнің дизайнын ойластыруға талпынып тұратын. Сондықтан ба, талғамы бөлек Нұржамалға достары мен көршілері келіп, «мына киімді қайтсек болады?» деп кеңесіп, тіпті фасонын сыздырып алатын. Кейін ол киімдер шынымен құйып қойғандай өте әдемі шығатын.
Балалық шағы мұнайлы қала – Жаңаөзенде өткен Нұржамалды мектептен кейін ата - анасы мұнай - химия технологиялық техникумына оқуға жібереді. Тігіншілікке ол уақытта пәлендей сұраныс жоқ, ал мұнайлы өлкеде мұнайшылықты таңдаған дұрыс сияқты еді. Дипломмен оралған жас маман облыстық газ мекемесінде слесарь, бір жылдан кейін техника кауіпсіздігінің инженері, көп ұзамай бөлім бастығы болып 10 шақты жылдай қызмет етеді. Бірақ кейін мекеме тарап, жұмыссыз қалады. Нағыз қиындық сонда басталады. «Кәсіп болар» деп дүкен ашады, ол ісі оңға баспайды. Тапсырыс алып, көрші-көлемге киім тігеді. Жеке өміріндегі қиындықтар қосылып, Жаңаөзеннен Ақтауға көшіп келген жылы біреудің ательесіне жұмысқа орналасады. Бірақ араға көп уақыт салмай, өз кәсібін ашуға бел буады. Сөйтіп 2001 жылы жеке ательесін ашады.
«Қазір айтуға оңай...Өте қиын болды. Девальвация кезі, адамдар 5-6 айлап жалақы алмайды. Өзімнің тұратын бір бөлмелі үйімді ателье қылдым. Таңертең ұйқыдан тұрғанда манекендер төбемнен төніп тұратын. Бір жылдан кейін ипотекаға екінші бір бөлмелі пәтер алдым. Ательеде бес адамбыз. Нанасыз ба, сол аядай бір бөлмелі пәтерді өзімізше салон қылып қоятынбыз. Тігіншілерміз балконда отырады, асханада киім пішесің. Залды салон қылып, сол жерде келушілерді қабылдап жатасың. Күнкөрістің қамымен бәрін тіктік: орамал, халат, ұлттық киімдер. Мойныңда несиең бар, қызметкерлерге жалақы беруің керек. Жалақы төлей алмайтын кездері үйдегі анамның алтынын, ұялы телефонды сатқан кездерім де болды. Адамдарымды жоғалтып алғым келмеді. Шынымды айтсам, қатты қиналған кездері қолымды бір сілтеп, барлығын жауып тастағым келген кездер де болды. Бірақ «шегінерге жол жоқ» деп өзімді өзім қайрап, жігерлендіріп, алға ұмтылдым», – дейді Нұржамал Нұрпейсова.
«Нұр-Шахтың» табысы үлкен еңбекпен келгенін түсіндік. Нұржамал Нұрпейісованың табандылығы, күш - қайраты мен жігері жеңіске әкелді. Кәсіпкердің айтуынша, қазіргі уақытта бизнеспен айналысамын деушілерге барлық жағдайлар бар. «Біз кәсіп бастаған жылдары ешкімнен көмек жоқ еді. Банктер саған сенбейді, несие бергісі келмейді. Несие берген күннің өзінде күнде келіп тексеріп отыратын. Ал қазір жақсы идеяң мен жобаң болса, мемлекет тарапынан көп қамқорлық көрсетіліп отыр. «Бизнестің жол картасы - 2020» бағдарламасының өзі - кәсіпкерлерге мол мүмкіндік», - дейді Нұржамал.
«Даму» КДҚ АҚ Маңғыстау облысы бойынша филиалының директоры Берік Нұрғалиевтің айтуынша, қазіргі таңда «Нұр-Шах» мемлекеттің қолдауына ие болып отырған кәсіпорындардың бірі. 2012 жылы кәсіпорын иесі бизнесін кеңейту мақсатымен «Бизнестің жол картасы-2020» мемлекеттік бағдарламасының аясында «Нұрбанктен» жылына 14 пайыздық мөлшерлемемен несие алып, «Даму» кәсіпкерлікті дамыту қоры соның бір бөлігін, яғни 7 пайызын субсидиялады.
Айта кету керек, кәсіпкер бұл қаржыға Ақтау қаласының 17 шағын ауданында цех ашу үшін тұрғын үйдің бір бөлігін сатып алды және мемлекет тарапынан көрсетілген қолдаудың арқасында кәсіпорын жұмысын жаңа сапалы деңгейге көтеруге мүмкіндік алды. Өндіріс көлемі ұлғайып, бұрын 25 жұмыс орны болса, несие алғаннан кейін жұмыс орнының саны 49 - ға дейін өсті. Бүгінде сән үйінің жұмыс өнімділігі 30-40 пайызға артып, 50 ден астам адамды жұмыспен қамтып отыр.
2016 жылы «Нұр - Шах» кәсіпорны мемлекеттік бағдарламаның көмегіне тағы жүгінді. Өңдеу өнеркәсібі саласындағы орта және шағын бизнесті қолдау бағытындағы «Даму өндіріс» бағдарламасының аясында жеңілдетілген шарттармен Ұлттық қор есебінен берілетін қаржылай көмекке ие болды. «Форте банк» арқылы мөлшерлемесі 6 пайыздық несие алып, құрал-жабдықтар сатып алуға, бизнес мүмкіндіктерін кеңейтуге жұмсады.
«Нұр-Шах» сән үйі қазіргі кезде 3 қалада - Астана, Ақтау, Жаңаөзенде өз ісін дөңгелетіп отыр. 2013 жылы сән үйі облыстық «Аймақтағы үздік тауарлар» байқауында І орын иеленді. Республикалық «Алтын сапа» байқауында өз бағасын алды. Маңғыстау өңірінің атынан республикалық, халықаралық түрлі көрмелерге де қатысып тұрады. Даму қорының қолдауымен, 2013 жылдың маусымында «Нұр – Шах» Малайзияда өткен SMIDEX 2013 халықаралық көрмесіне қатысып, өз бұйымдарын таныстыруға, іскерлік байланыс орнатып қайтуға мүмкіндік алды.
Сән үйінің ұлттық киімдері мен әшекей бұйымдары Қазақстанда ғана емес, басқа мемлекеттерде де сұранысқа ие. Әр келушінің талғамын ескеруге тырысады, заманауи ұлттық киімдердің үлгілерін ұсынады. Бір киімге 10-15 күн кетсе, енді біріне, оның ішінде моншақпен, маржан - інжу тастармен көмкерілген, қолдан тігілген көйлекке бір айдан астам уақыт кетеді. Күрделілігіне қарай бағасы. Өзіндік қолтаңбасы бар «Нұр – Шах» сән үйіне әйгілі жұлдыздар мен саясаткерлер де тапсырыс беріп жатады. Міне, «Нұр – Шахтың» табысқа жету жолындағы тарихы осындай. 15 жыл бойы ел ықыласына бөленіп келе жатырған компания алдағы уақытта да ұлттық құндылықтардың ұлықтаушысы боларына сеніміміз мол.
Алтынгүл Меңдіхан, Маңғыстау облысы
Просмотров материала: 14 851
