Бүгін І.Жансүгіров атындағы Мәдениет сарайында Алматы облысының әкімі Амандық Баталовтың тұрғындар алдындағы есеп беру кездесу өтті. Алқалы жиынға облыстың жергілікті басқару қызметтерінің өкілдері, облыс тұрғындары мен ардагерлер, аймақтық кәсіпкерлер қатысты. Сонымен қатар, ҚР Денсаулық сақтау және әлеуметтік даму министрі Тамара Дүйсенова арнайы келіп, өңірдің тыныс-тіршілігі жайындағы есебімен танысты. Жиын соңынан министр Ардагерлер үйінде облыс ардагерлерімен кездесіп, Елбасы бастамасымен халықтың әлеуметтік жағдайын жақсарту мақсатында атқарылып жатқан істерден хабардар етті.
Облыс әкімі А. Батталов өткен 2014 жылды түйіндеп, облыс көлемінде атқарылған бір жылдық жұмыстың есебімен таныстырды: «2014 жыл Жетісу халқы үшін табысы мол, толайым жыл болды. Экономика өнімді, шаруашылық сенімді дамыды.Мемлекет басшысының тікелей қолдауымен бір жыл ішінде облыстың әлеуметтік-экономикалық даму көрсеткіштері ойдағыдай орындалды» деп бастады өз сөзін.
Есеп беру жиынында облыс әкімі Алматы облысының өткен жылғы ұмтытыстары мен ұтылыстарын, бары мен жоғын бүтіндеп, аймақ тұрғындарының сұрақтарына жауап берді.
Аймақ басшысының жылдық есебі Алматы облысының әр саладағы жетістіктерін сөз етуден басталды. Мәселен, өңірдегі өнеркәсіп саласындағы өсім 1,9% , ал ауыл шаруашылығының жалпы өнімі 1,4%-ке артқан. Құрылыс жұмыстарының көлемі 202 млрд. теңгеге жетті, 453 млрд. тенге инвестиция тартылып, мемлекеттік бюджетке 289 млрд. теңге түсті. 20 мың 700 жұмыс орындары құрылып, жұмыссыздық деңгейі 4,8%-ке дейін төмендеді (2013г. – 4,9%) Сонымен, қатар бұл көрсеткіштердің әлі де жақсаратынын, аймақты дамыту жолында табанды еңбек етіп жатқандарын да айтып өтті.
Алматы облысы – аграрлық аймақ. Облыс табысының басым бөлігін аграрлық сала құрайды. Сондықтан, жанға да, малға да жайлы Жетісу өңіріндегі аграрлық саланың бүгінгі хал-ахуалы мен ертеңгі дамуы да күн тәртібіндегі мәселе. Бұл туралы облыс басшыс мал шаруашылығының кемшін тұстары тілге тиек етілді. «Ірі қара мал етінің экспорттық әлеуетін дамыту бағдарламасының өткен жылғы жоспары орындалмады, 100 тонна еттің орнына небәрі 20 тонна ғана өндірілді. Құрылған бордақылау алаңдары қарабайыр, өз қуаттылығынан әлдеқайда төмен (70%) және барлық аудандарда мал басы жеткілікті болғанымен, кей жерлерде алаңдар мүлдем жоқ. «Мал баққанға бітеді» демекші, облыстың мал өсірушілері осы бағыттағы жұмыстарды тиянақтылап, қуаттылығы 1,5 мың бастан асатын заманға сай мал бордақылау алаңдарын, ірі репродуктор-шаруашылықтар құруға талпынулары тиіс», -деп облыс кәсіпкерлері мен шаруа қожалық иелеріне мал шаруашылығын жандандыруды тапсырды. Сонымен қатар, жүгері, қант қызылшасы мен апорт өсіруге көңіл бөлу керектігін де тілге тиек етті.
Әкім есебіне орай ұйымдастырылған көрме
Биыл «Агробизнес-2020» бағдарламасы аясында ауылшаруашылығына берілетін мемлекеттік көмектің көлемін 21 млрд. теңгеге дейін жеткізу көзделуде. Бұл қаржы аймақтың агросаласында дамытуға мемлекет тарапынан жасалған үлкен мүмкіндік екені айқын. Тек орынды игерілсе болғаны.
Өңірде күн тәртібінде тұрған түйткілді мәселе де көп. Халықтық әлеуметтік ахуалы айтарлықтай мәз емес. Аймақтар ауыз сумен толық қамтамасыз етілмеген. Мәселен, Алматы облысы бойынша 197 елді-мекенде тұщу суға зәру болып отыр. Алайда, әкім өз сөзінде халықтың әлеуметтік жағдайын барынша жақсартуға күш салып жатқандарын және ауыз сумен қамтамасыз етілетін де айтып өтті. Ауыз сумен қамтамасыз етуге арналған «Ақбұлақ» бағдарламасына сәйкес, 36 нысанның құрылысы жүріп жатыр. Ал, 500 –ден астам тұрғыны бар 61 ауылда субұрғылары жөнделіп, су жүйесі ретке келтірілетін болады.
Алматы өңірін көркейтудің тағы бір жолы – туризмді дамыту. Осы орайда, Алакөл жағалауында 500 орындық «AQUAMARINE resort» демалыс орны ашылу жоспарлануда. Ал, аймақтағы жолдар да күрделі жөндеуден өткізілуі де маңызды мәселе. Үшарал – Достық тас жолының құрылысы биыл бітсе, «Алматы-Қапшағай», «Алматы-Өскемен» тас жолдарында жөндеу жұмыстары жүргізілуде. Бүгінгі таңда Балқаш және Алакөл көлдерінің жағалауларында демалыс аймақтарының Бас жоспары әзірленді. Туристердің қиындықсыз қатынауы үшін «Үшарал» әскери аэродромын пайдалану және «Алматы-Достық» бағыты бойынша жаңа үлгідегі жүрдек поезд жүргізу қолға алынбақ.
«Лесная сказка» демалыс орнының жобасы
Кездесу барысында тек өткен жылдың мәселесі ғана емес, болашақтың да жоспарлары талқыланды. «Үстіміздегі жылы осы қарқынды сақтай отырып, экономиканың өсімін 2,5%-ке қамтамасыз етуді жоспарлап отырмыз» деген сенімін жеткізді облыс әкімі. Сұрақтар қойылып, жазбаша өтініштер мен ұсыныстар табысталды. Кездесуде ауылшаруашылығы, кәсіпкерлікті дамыту, жер мәселесі, инвесторлар тарту, жол жөндеу, тұрғын үй мәселесі, апатты мектептер, субсидиялардың берілуі мен жеке қабылдау мәселелеріне қатысты жазбаша және ауызша түрде барлығы 50-ден астам сұрақ түсті. Облыс әкімі А.Батталов барлық мәселе шешімін табатынын қадап айтты.
2015 жылы Қоянқұс ауданында алғашқы G-4 спутник қаласының тұрғын үй құрылыстары бой көтеретін болады
IMG_6927Еліміздің спорт саласының ардагері Жақсылық Үшкемпіров осы жиынға тек спортшы ғана емес, аймақтың белгілі кәсіпкері ретінде қатысты. «Мен олимпиада немесе әлем чемпиоан болсам да, қазақ азаматы ретінде қазір Балқаш және Жамбыл аудандарында еңбек етіп жатырмын. Әсіресе, ауыл шаруашылығын көтеруге атсалысудамын. Қазір шаруашылығымда 5 мыңдай ірі қара және 2 мыңдай жылқы бар. Ет экспорттау мәселесі де шешімін табуда, ауылда жастарға арналған спорт кешендері салынды. Сонымен қатар, жақында Жамбыл ауданындағы Мыңбаев ауылында 100 орындық балабақша аштым. Мұның бәрі болашақтың қамы. Менің ойымша, әрбір ауылда бас көтерер бір азамат болса, ауылдың жағдайы көтерілер еді»
Жақсылық Үшкемпіров, Халықаралық спорт шебері
Жиынға қатысқан Қазақстан Республикасы Президенті Әкімшілігінің бас инспекторы Жайсан Ахметов пен Қазақстан Республикасы Парламенті Сенатының депутаты Ләззат Тұрлашев әкім жұмысына оң баға берді.
Ал, есеп беру жиынынан соң ҚР Денсаулық сақтау және әлеуметтік даму министрі Тамара Дүйсенова қаладаға Ардагерлер үйіне барды.Облыстық ардагерлер ұйымының тарапынан атқарылған жұмыс барысымен қаныққан Тамара Дүйсенова Үкіметтің кеңейтілген отырысында Елбасының халықтың алаңсыз өмір сүруін қамтамасыз ету үшін әлеуметтік саланың бюджетін қысқартпау туралы Үкіметке берген тапсырмасын айта келіп, алдағы уақытта әлеуметтік сала бүйірінің тоқ болатынын ескертті. Сондықтан, зейнетақы, жәрдемақы, тағы басқа да әлеуметтік жеңілдіктердің, Отан соғысы ардагерлеріне жасалатын көмек арнасының қысқармайтынын жеткізді. Сондай-ақ, әлеуметтік саланы дамытудың бағыт-бағдары, зейнеткерлердің мүддесін қамтамасыз етудегі жаңалықтар мен жеңілдіктер туралы да толыққанды түсіндіріп, көпшіліктен түскен сұрақтарға жауап берді.
Жания Әбдібек,
Алматы-Талдықорған
Просмотров материала: 2 256
