Бұрынғы Әділет министрі Конституциялық соттың судьясы болып сайланды

Оның кандидатурасын Мәжіліс отырысында палата төрағасы Ерлан Қошанов ұсынды.

«Қанат Сергейұлы Мусинді жақсы білесіздер, ол ұзақ жылдар бойы құқықтық қорғау және әділет органдарында қызмет етті, Мәжіліс депутаты, комитет төрағасы болды. Қазіргі уақытта ол еліміздің әділет министрі қызметін атқарады», — деді Мәжіліс спикері Ерлан Қошанов.

Мәжіліс депутаттары Қанат Мусин, Еркін Оңғарбаев және Сергей Ударцевтің кандидатураларына дауыс берді. Олар жаңа қызметтеріне 2023 жылдың 1 қаңтарынан бастап кіріседі.

«Конституцияның 58-бабы 3-тармағы 7-тармақшасына сәйкес Парламент Мәжілісінің төрағасы Қанат Сергейұлы Мусинді, Еркін Әнуарұлы Оңғарбаевты, Сергей Федорұлы Ударцевті қызметке тағайындау туралы ұсыныс енгізілді», — деді Мәжіліс депутаты Арман Қожахметов.

Айта кетейік, Қанат Мусин Әділет министрі қызметінен босатылды.