Алматыда жастарға арналған тегін курстар ашылды
Жұмысқа орналастыру үшін Jobfаir365 бірыңғай платформасы құрылды
Алматы қаласы Жастар саясаты басқармасы жастардың жұмыс іздеуіне арналған Jobfair365 бірыңғай платформасын іске қосты, деп хабарлайды Azattyq Ruhy.
Қызметтер тізімін https://jasalmaty.kz/ сайтынан көруге болады. Бағдарлама үш аспектіні қамтиды — жастарға өз мамандығы бойынша жұмыс табуға көмектесетін жұмысқа орналастыру қызметі, білім беру бағдарламаларына қол жеткізуді қамтамасыз ететін тегін курстар қызметі және қаламыздың жастарына арналған ақпараттық портал.
Сонымен қатар, сайтта сертификат беретін орыс және қазақ тілдеріндегі қысқа мерзімді курстар бар.
«Қысқа мерзімді курстардың тізімін анықтау үшін еңбек нарығындағы сұранысқа талдау жүргізілді. Талдау жастарды табысты жұмысқа орналастыру үшін қажетті өзекті әрі сұранысқа ие мамандықтарды анықтауға мүмкіндік берді. Осылайша, курстар ақпараттық технология, цифрлық маркетинг, қаржы, бухгалтерлік есеп, жобаны басқару, кәсіпкерлік, дизайн, сату менеджері, SMM менеджері, мобилограф, графикалық дизайнер, таргетолог, туроператор, гид, курьер, хаускипер және т.б. салаларды қамтиды», -деді Алматы қаласы әкімдігінің баспасөз қызметі.
Курстың бағытына байланысты сабақ 20-дан 30-ға адамға дейінгі топқа өткізіледі. Пайдаланушылар аптасына 3 реттен 2-3 сағат оқиды, онда оқытудың теориялық бөлігі 1 айдан 1,5 айға дейін созылады.
Қазіргі уақытта порталда 3,7 мың бос жұмыс орны бар және 20 өңірден 1,5 мың жұмыс беруші тіркелген. Бүгінде 10,2 мың адам оқытылды, оның 9,2 мыңы жұмысқа орналастырылды.
