Ресей билігі Қазақстанға орыс тілі мұғалімдерін жіберуге дайын екенін білдірді
Ресей Қазақстан мектептеріне орыс тілі мен басқа да пәндерді орыс тілінде оқытатын мұғалімдерді жіберуге дайын екенін білдірді. Екі елдің білім министрліктерінің басшыларының кездесуінде Қазақстанда орыс тілін насихаттау мәселелері де талқыланғаны айтылады. Бұл туралы Stan.kz ақпарат агенттігі Русский мир сайтына сілтеме жасап хабарлайды.
Ресейлік басылымға жарияланған ақпаратқа қарағанда, Ресей білім министрінің орынбасары Денис Грибов пен Қазақстан оқу-ағарту министрлігінің бірінші орынбасары Наталья Жұмаділдаеваның кездесуінде республика мұғалімдерінің біліктілігін арттыруға Ресейдің қатысу мәселесі талқыланған.
Кездесу барысында кәсіптік білім беру саласындағы ынтымақтастық мәселелері, оның ішінде «Кәсібилік» федералды жобасын жүзеге асырудағы ресейлік тәжірибені зерделеу мәселелері де қарастырылған. Ресей тарапы Қазақстан мектептеріне орыс тіліндегі оқулықтар мен орыс тілінде білім беретін пән мұғалімдерін жіберуді ұсынған.
Ресей үкіметі үйінде Ресей премьер-министрі Михаил Мишустин мен Қазақстан премьер-министрі Олжас Бектеновтің келіссөздері аясында екі елдің білім министрліктері өкілдерінің кездесуі өткені атап өтіледі.
“Талқыланған тақырыптардың ішінде гуманитарлық ынтымақтастық және Қазақстанда орыс тілін насихаттау мәселелерін қамтыды. Ресей үкіметінің басшысы екі мемлекетті тығыз мәдени-гуманитарлық байланыстар байланыстыратынын атап өтті. Михаил Мишустин қазақстандық тарапқа орыс тіліне ұқыпты көзқарасы үшін алғысын білдірді”, – деп жазады басылым.
Еске салайық, 2022 жылы Қазақстан президенті Қасым-Жомарт Тоқаев ТМД жанынан орыс тілін насихаттайтын ұйым құру туралы бастама көтерген. Президенттің идеясы Франкофония тәжірибесіне ұқсас халықаралық ұйым құру. Франкофония — француз тілді елдердің халықаралық ұйымы. Ол француз тілін танымал етеді.
Тоқаев түсіндіргендей, Қазақстанның орыс тілін қолдайтын және ілгерілететін халықаралық құрылым құру туралы ұсынысы ТМД халықтарының одан әрі жақындасуына ықпал етуді көздейді.
Ал 2023 жылы ТМД аумағында Орыс тілі жылы болып жарияланды. Тоқаев орыс тілінің Тәуелсіз Мемлекеттер Достастығының маңызды біріктіруші факторы мен ортақ мәдени-гуманитарлық кеңістігі екенін алға тартқан. Қазақстан басшысы кезінде француз, неміс, испан және басқа да тілдерді дамыту үшін осындай халықаралық ұйымдар құрылғандықтан, әлемдік тәжірибе орыс тілі жөніндегі халықаралық ұйым құру туралы бастамаға негіз болғанын атап өтеді.
Сол жылы Ресей президенті Владимир Путин орыс тілі жөніндегі халықаралық ұйым құру идеясын Қасым-Жомарт Тоқаев ұсынғанын айтқан. Путиннің айтуынша, халықаралық ұйым құруды Ресей тарапы ұсынбаған. 2023 жылы 13 қазанда Бішкекте ТМД мемлекеттерінің басшылары штаб-пәтері Сочиде орналасқан орыс тілі жөніндегі халықаралық ұйым құру туралы құжаттарға қол қойды.
Кейін Қазақстанның оңтүстігінде орыс тілінде оқытатын үш мектеп салу жоспарланып жатқаны белгілі болды.
