Атыраулық балалар үйінің түлектері баспанасыз жүр

Қазақстанда жетім және ата-ана қамқорлығынсыз қалған балалар баспанамен қамтылуы тиіс болғанымен, үйсіз жүргендер жетерлік. Мәселен, Атырауда соңғы жылдары балалар үйінің түлектеріне баспана берілмеген. Енді олардың пәтер жалдауға мәжбүр. Жергілікті әкімдік өкілдері мұның себебін өңірде бос үйдің жоқтығымен түсіндіреді.

Балалар үйінде тәрбиеленген Арман Сәрсенғали он жылдан бері тұрғын үй кезегінде тұр. Әйтсе де, әкімдіктегі мамандар оған күтуден басқа амал жоқтығын айтқан.

«Біз мемлекет қамқорлығындағы жандар болғандықтан бір жеңілдігі болар деп келешекке үмітпен қараймыз ғой. Бірақ, осылай жүргенде уақыт та зырылдап өте шықты. Бар тапқан табысымды пәтер жалдауға жұмсадым. Енді оған да төлейтін қаражат қалмады. Ер азамат болған соң үкіметке де алақан жайғым келмейді. Банктен несиеге алған ақшам азық-түлікке ғана жетеді. Үйсіз-күйсіз қаңғып жүргеніме біраз жыл болды», — дейді ол.

Атырау қалалық әкімдігінен білгеніміздей, алдағы уақытта жалға берілетін үйлерді көбейту мәселесі қарастырылып жатыр. Яғни, баспанасыз жүрген балалар үйінің түлектері жеңілдікпен үй жалдай алады.

«Жалпы, өңірде пәтер саны аз болғандықтан оларды көбейту жөнінде жоғары органдарға ұсыныс жолдадық. Бұл мәселе қазір қаралып жатыр. Ал, жергілікті әкімдік тарапынан жалға берілетін пәтер санын көбейтуді көздеп отырмыз. Әзірге осы екі бағытта жұмыстар жүргізілуде. Көп кешікпей нәтижесін беріп қалар», — деп сендіреді Атырау қалалық тұрғын үй-коммуналдық шаруашылық бөлімінің сектор меңгерушісі Рафхат Жолдиев.

Айта кетейік, бұған дейін біз Үкіметтің құрылыс саласын жетілдіріп, баспанаға мұқтаж адамдарға басымдық берілетінінжазған едік.