Chevron компаниясы Almaty Museum of Arts-тың білім беру платформасы – Şeberhana-ның тұңғыш серіктесі атанбақ

ALMA Şeberhana білім беру бағдарламасы 2025 жылдың желтоқсанында ашылды. Şeberhana ашық білім беру кеңістігі ретінде құрылып, музейді көпшілік бас қосып, өнерден ой түйіп, шабыт алып, өзінің де шығармашыл қауқарын танытып, жаңа байланыстар орнатып, өмір бойы білімін жетілдіре алатын орта құруды мақсат етеді. Бағдарлама аясында өнер, дизайн, қолөнер және баспа графикасы бойынша түрлі сабақтар өткізіледі. Ол жерде бір жолғы шеберлік сабақтарынан бастап, тұтас бір семестрге созылатын курстарға дейін қамтылады. Şeberhana-ның барлық бастамасы Орталық Азияның ғасырлардан тамыр тартқан өнері мен қолөнер дәстүрін арқау етеді. Бағдарламалар жергілікті және шетелдік суретшілермен бірлесе әзірленіп, дәстүрлі мұраны бүгінгі шығармашылық ізденістермен сабақтастырады.

Şeberhana жұмысын бастаған алғашқы жеті айдың ішінде 83 сессия өткізіп, оған 3 700 адам қатысты. Қатысушылардың 77%-дан астамы тегін іс-шараларға келген.

Şeberhana кеңістігі баршаға бірдей қолжетімді болуға аса мән береді. Мұнда қимыл-қозғалысы шектеулі қонақтарға арналған жеке кіреберіс пен көтергіш жүйе қарастырылған. Үш тілде бағдар беретін навигация жүйесі де келушілерге ыңғайлы етіп жасалған. Ал кеңістіктегі сабақтар мен іс-шаралар аудиторияның сенсорлық және психикалық ерекшеліктерін ескере отырып бейімделген.

Chevron-мен серіктестік орнату Şeberhana-ға жекелеген бастамамен шектелмей, оны жүйелі әрі тұрақты тәжірибеге айналдыруға мүмкіндік береді. Соның арқасында музей тегін және жеңілдетілген бағдарламаларын сақтап қалып қана қоймай, одан әрі дамыта алады. Сондай-ақ 2026 жылы заманауи өнермен қауышуға мүмкіндігі бүгінгі таңда шектеулі адамдарға арналған жаңа бағыттарды іске қосуды жоспарлап отыр.

«Біз үшін білім беру музейдің негізгі қызметтерінің бірі саналады. Біз өнермен жүздесудің музейдегі экспонатты тамашалаумен ғана шектелмей, әр адамның өз бетінше ізденуіне, тәжірибе алмасып, жаңа дүние жасауына бастау болғанын қалаймыз. Chevron компаниясымен орнатылған осы серіктестік музейдегі тегін бағдарламалардың едәуір бөлігін сақтап қалуымызға сеп болып қана қоймай, өнерді дизайн, материалдар, технологиялар һәм әлемді танудың өзге де тәсілдерімен ұштастыратын бағытты одан әрі дамытуға мүмкіндік береді. Chevron-ның тұрақты даму бағытындағы жүйелі ұстанымын біздің әдістемелік тәжірибемізбен, өнер арқылы білім берудің қыр-сырын түсінетін кәсіби біліктілігімізбен ұштастыра отырып, баршаға қолжетімді әрі инклюзив мәдени-ағартушылық институттың тиімді үлгісін қалыптастырып келеміз», – дейді Almaty Museum of Arts директоры Татьяна Ходжаева.

Серіктестік музей басымдық беретін тағы екі маңызды бағыттың аясын кеңейтуге мүмкіндік береді. Оның бірі – көркемдік тәжірибелерге қолжетімділікті арттыра отырып, инклюзив білім беруді дамыту. Екіншісі – өнерді ғылым, технологиялар, материал мен мәдениетті зерттеуге бастайтын өзекті арна ретінде қарастыратын STEAM орта қалыптастыру.

STEAM орта аясында қатысушылар сурет салу мен мүсіндеуден бастап, керамика мен граттажға дейінгі түрлі көркемдік тәсілдерді меңгереді. Олар түрлі материалдың қасиеті мен мүмкіндігін зерттеп, дизайнның қыр-сырына үңіледі, сәулет өнерімен танысып, заманауи суретшілермен бірлесіп жұмыс істейді. Бағдарламалардың мазмұны мен әдістемесін Almaty Museum of Arts командасы әзірлейді.

Серіктестік аясында Şeberhana-ның төрт негізгі бағдарламасын дамытуға ден қоямыз:

Aşyq Şeberhana – музей атриумында апта сайын өткізілетін тегін өнер сабақтары. Аталған белсенділікке қатысушыларға жас шектеуі қойылмайды және шығармашылық жолдағы тәжірибесінің болуы да маңызды емес, бәріне ортақ қолжетімді.

Nobai – музей галереяларында өтетін тегін сурет салу клубы. Мұнда қатысушылар жан-жағына зер салып, сурет салу тәжірибесіне ден қоя отырып, музей кеңістігі мен өнер туындыларын жаңа қырынан зерттейді.

ALMA Makes! – 7–11 жастағы балаларға арналған шығармашылық курс. Әр модулі өнердің жаңа бір бағытын таныстырып, балаларға оның сан алуан түрін байқап көруге мүмкіндік береді. Балалар жаңа дүниені үйреніп қана қоймай, өз жобаларын жасап, тәжірибе жасап, шығармашылығын еркін танытудың жолын табады.

Artist Workshop түрлі жастағы қатысушыларды арнайы шақырылған суретшілермен кездестіреді. Суретшілер музей қорындағы туындылар мен өздерінің шығармашылық тәжірибесіне сүйене отырып, практикалық сабақтар әзірлейді.

Тегін және ақылы форматтардың қатар қолданылуы Şeberhana-ға білім беру мүмкіндіктерінің қолжетімділігін кеңейтіп қана қоймай, білім беру платформасының тұрақты жұмыс істеу моделін қалыптастыруға мүмкіндік береді. Бағдарламаларды одан әрі дамыту барысында музей Chevron компаниясы көп жылдан бері қолдау көрсетіп келе жатқан серіктес ұйымдармен де бірлесіп жұмыс істейді. Олардың қатарында «Мама Про» қоры, Қолөнершілер одағы және басқа да ұйымдар бар.

«Өнер адамға жаңа мүмкіндіктерді көруге, көкейінде сауал туып, соның жолында ізденуге, шабыт сыйлар дүние тауып, өз күшіне сенуге жол ашады. Сондықтан балалар, жастар мен отбасыларға шығармашылық білім алуға мүмкіндік беретін Şeberhana-мен орнатып отырған серіктестігіміз біз үшін айрықша маңызды. Chevron компаниясы Қазақстандағы адам әлеуетін дамытуға 30 жылдан астам уақыт бойы білім беру және әлеуметтік бастамаларды қолдау арқылы өз үлесін қосып келеді. Біз білімге, шығармашылыққа және өзін-өзі дамытуға қолжетімділік адамның өз мүмкіндігін толық ашуына, сондай-ақ өзі өмір сүретін ортаға оң өзгерістер әкелуіне ықпал етеді деп сенеміз», – дейді Chevron Eurasia компаниясының әлеуметтік инвестициялар жөніндегі аға кеңесшісі Лейла Айтмұханова.

Almaty Museum of Arts пен Chevron арасындағы серіктестік алты айға есептелген және білім беру бағдарламалары саласындағы ынтымақтастықтың алғашқы кезеңі болмақ. Осы уақыт ішінде тараптар бірлескен жұмыстың нәтижесін саралап, алдағы қадамдардың негізгі бағыттарын айқындайды.

Қазақстанда Chevron компаниясы адам әлеуетін дамытуға және жергілікті қауымдастықтарды қолдауға бағытталған ұзақ мерзімді әлеуметтік бағдарламаларды жүзеге асырып келеді. Компания білім беру мекемелерімен, коммерциялық емес ұйымдармен және мәдени бастамалармен бірлесіп, білім беру, кәсіпкерлік, инклюзия, мәдени мұраны сақтау және заманауи дағдыларды дамыту салаларындағы жобаларға қолдау көрсетеді. Компанияның серіктестері қатарында жастармен, әйел кәсіпкерлермен, мүмкіндігі шектеулі жандармен және шығармашылық кәсіп иелерімен жұмыс істейтін қорлар мен қоғамдық ұйымдар бар. Şeberhana білім беру платформасымен басталған жаңа серіктестік осы бағыттағы қолдауды одан әрі кеңейтіп, өнерді қолдауды, инклюзив білім беруді және STEAM тәсілін көпшілікке қолжетімді етуді бір арнаға тоғыстырады.

_______________________________________________

Анықтамалық ақпарат

«Шеврон» – дүниежүзіндегі жетекші интеграцияланған энергетикалық компаниялардың бірі. Біз адамзаттың ілгері дамуы үшін қолжетімді, сенімді әрі таза қуат көзі қажет деп санаймыз. «Шеврон» мұнай мен табиғи газ шығарады, жанар-жағармай және мұнай-химия өндірумен айналысады, бизнес пен өнеркәсіпті жетілдіретін технологияларды дамытады. Біздің мақсатымыз мұнай және газ саласындағы бизнесімізді дамыту, өндірістік қызметіміздегі көміртек шығарындыларын азайту, жаңа энергетикалық бизнес бағыттарды жетілдіру және инновациялық технологияларды қаржыландыру болып табылады. «Шеврон» туралы толық ақпаратты www.chevron.com сайтынан табуға болады.

Almaty Museum of Arts (ALMA) – Қазақстандық коллекционер әрі меценат Нұрлан Смағұлов негізін қалаған жаңа заманауи өнердің жеке мұражайы. Мұражай 2025 жылдың күзінде ашылды.
Музей миссиясы – өнер атаулымен жақын байланыс жасап, ашық диалог орнату арқылы адам мен қоғамның дамуына жол салатын кеңістік құру. Мұражай Қазақстан мен Орталық Азия өнерін зерттеп, қолдап, қастерлеп сақтаумен қатар, оны жаһандық көркем оймен ұштастыра отырып, кәсіби орта мен қарапайым қауымға бағытталған тұрақты мәдени кеңістік қалыптастырады.

ALMA қорында 700-ден астам өнер туындысы бар, оған қазақстандық шеберлердің (Айша Ғалымбаева, Салихитдин Айтбаев, Рустам Хальфин, Алмагүл Меңлібаева және басқалары) шығармалары мен жаһандық өнердің негізгі есімдері кіреді: Ричард Серра, Яёи Кусама, Ансельм Кифер, Билл Виола. Йинка Шонибаре, Алисия Кваде және Жауме Пленсаның арнайы Almaty Museum of Arts үшін жасаған ашық аспан астындағы монументал мүсіндерінің орны тым бөлек.  Мұражайдың сәулеті британиялық Chapman Taylor бюросы, сондай-ақ Lord Cultural Resources және Buro Happold компанияларының қатысуымен жасалған (Buro Happold портфолиосында Guggenheim Bilbao, Louvre, Centre Pompidou бар). Сәулеті қос L тәрізді құрылымнан тұрады, оның бір бөлігі Тянь-Шань тауларын еске салатын Юра әктасымен қапталса, ал екіншісі қала тұрмысының қарқынды ырғағын көрсететін алюминий панельдермен жабылған.
ALMA-ның бас серіктесі – Қазақстандағы ең ірі банктердің бірі саналатын Halyk банкі. Halyk қайырымдылық бастамаларымен де кеңінен танымал. Соңғы бес жыл ішінде банк пен «Halyk» қайырымдылық қоры еліміздің түкпір-түкпіріндегі әлеуметтік жобаларға шамамен 62 млрд теңге бөлді.

Келушілерге арналған ақпарат

Мұражай дүйсенбіден басқа күндері күн сайын 11:00–21:00 аралығында жұмыс істейді (кіру уақыты 20:00-ге дейін).

Стандартты билет құны – 2000 теңге, арнайы билет – 500 теңге. Әртүрлі санаттағы келушілер үшін қосымша жеңілдіктер мен тегін кіру мүмкіндіктері қарастырылған. Билеттер құны мен экскурсия бағдарламасы туралы толық ақпаратты мұражайдың сайтынан таба аласыз.

Instagram:https://www.instagram.com/almatymuseumofarts/
TikTok:https://www.tiktok.com/tag/almatymuseumofarts