Қазақстанның мұнай өндірісі азайып кетті – табыс түспей жатыр

БАЙБАЗАРОВ НЕ ДЕЙДІ

Жиында баяндама жасаған вице-премьер – Ұлттық экономика министрі Нұрлан Байбазаровтың айтуынша, биыл қаңтар-қыркүйектің қорытындысы бойынша экономиканың өсуі 4% құраған. Қабылданып жатқан шаралардың нәтижесінде үшінші ай қатарынан өсімнің жеделдеуі байқалады.

– Нақты сектордағы өсім 5% құрады. Көрсетілетін қызметтер саласындағы өндіріс 3,8%-ке артты. Биыл экономиканың өсуі толығымен шикізаттық емес сектордың дамуы есебінен қамтамасыз етілуде. Салалар арасында ең жоғары өсуді ауыл шаруашылығы мен құрылыс саласы көрсетіп отыр. Көлік қызметі 8,0%-ке, байланыс 6,4%-ке, сауда 6,3%-ке, өңдеу өнеркәсібі 4,8%-ке өсті. Жалпы ішкі өнімнің өсуінің 65%-і сауда, өңдеу өнеркәсібі, құрылыс және ауыл шаруашылығы есебінен қамтамасыз етілді Негізгі капиталға салынған инвестициялар 0,6%-ке өсті. Инвестицияның ең жоғары өсуі шикізаттық емес салаларда байқалады. Инвестиция көлемі байланыста 81,7%-ке, білім беруде – 79,3%-ке, көлікте – 31,1%-ке, өңдеу өнеркәсібінде – 6,3%-ке, денсаулық сақтауда – 4,8%-ке өсті, – дейді ол.

Байбазаровтың сөзінше, үздік көрсеткіштер Алматы, Жетісу, Павлодар, Қызылорда және Түркістан облыстарында байқалады.Атырау, Ақмола, Ақтөбе және Маңғыстау облыстарында инвестициялар айтарлықтай төмендеген.

ЖІӨ-ГЕ КЕРІ ӘСЕРІ

Қаржы министрі Мәди Тәкиевтің мәліметінше, мұнай өндіру көлемі 5,3 млн тоннаға қысқарған. Баяндаманы тыңдаған Үкімет басшысы Олжас Бектенов мұнай өндірісі төмендеп кеткеніне назар аударды.

– Бұл ЖІӨ өсуіне кері әсерін тигізді. Алайда мұнайдың тыс сектордан табыс түсіп жатыр. Бұған экономиканы әртараптандырудың арқасында қол жеткізілді, – дейді ол.

Бектенов қазір өсімге қол жеткізе алмаған әкімдерді тыңдап жатыр.