Көлеңкелі экономиканы азайтудың негізгі жолы – мемлекеттік органдардың ақпараттық жүйелерін жаппай цифрландыру. Бұл туралы Үкімет отырысында Премьер-Министр Әлихан Смайылов айтты, деп хабарлайды ҚазАқпарат тілшісі.
«Шілде айында алдағы 3 жылға арналған Көлеңкелі экономикаға қарсы іс-қимыл жөніндегі кешенді іс-шаралар жоспары жаңартылды. Заңсыз бизнестің үлесін азайту – ол бюджетке түсетін қосымша табыс көзі екенін түсінуіміз керек», — деді Әлихан Смайылов.
Үкімет басшысының атап өтуінше, көлеңкелі экономиканы азайтудың негізгі жолы мемлекеттік органдардың ақпараттық жүйелерін жаппай цифрландыру және интеграциялау болып саналады.
«Бұл жұмысты күшейтіп, жоспарланған барлық іс-шаралардың уақытылы орындалуын қамтамасыз ету керек. Цифрлық даму министрлігі осы мәселені бақылауда ұстауы тиіс», — деді Премьер-Министр.
