«Үкімет неге құлақсыз туған бөбектердің ертеңіне енжар қарайды»: Нартай Сәрсенғалиев Дүйсеноваға депутаттық сауал жолдады
Мәжіліс депутаты Нартай Сәрсенғалиев премьер-министрдің орынбасары Тамара Дүйсеноваға Қазақстанда 3000 баланың өмірге құлақсыз келуіне қатысты депутаттық сауалын жолдады. Бұл туралы Stan.kz ақпарат агенттігі хабарлайды.
Депутат өз сұрауының басын, Дүйсеноваға “Бұл жағдайды үкімет естіді ме, естісе неге өмірге естімей келген балалардың ертеңіне енжар қарайды?” деген сауалымен бастады. Сондай-ақ ол күйік микротия және атрезия патологиясымен туған балаларға тіпті зейнетақы төленбейтінін айтты.
«Құлақсыз туып, қоғамнан қағажу көріп, тәрбиесіз, тәртіпсіз қатарластарының мазағына тап болып, төрт қабырғаға өз еркімен қамалған микротия және атрезия диагнозы қойылған балаларды биліктің қалай өзекке тепкенін айтайын. Біріншіден, бір құлағы жоқ болып дүние есігін ашқан сәбилер мүгедек боп танылмайды. Зейнетақы алмайды. Біздің елде мүгедектік алу үшін екі құлағың да болмауы керек екен. Қазақ «Баланың ұяты – әкеге, қыздың ұяты – шешеге» дейді, ал құлақсыз туған бөбектердің жанайқайын естімейтін құлағы бар биліктің ұяты кімге?», – деді ол.
Сондай-ақ Нартай Аралбайұлы баласы мұндай дертке шалдыққан ата-аналардың үкіметке хат жолдағанын, алайда «микротия және атрезия патологиясы бар балалар бюджет қаражаты есебінен шетелге емделуге жіберілетін балалар санатына жатпайды» деген жауап алғанын айтты.
«Микротия және атрезия патологиясының емі бар екен, құлақтың ішіне ота жасап, есту каналдарын ашып, сыртына табиғи құлаққа ұқсас қалып орнатып береді. Ол АҚШ-да. Бір құлаққа жасалатын операцияның құны былтыр 99 000 доллар болған, биыл 105 200 доллар. 1 ай уақытты алатын реабилитация, барып-келу жолы, жатын орын, тамақ дегендерің – аталған ақшадан бөлек шығын.
Естімейтін баламның үнін естіртейін деп ата-аналар үкіметке жүгінген ғой. Мынадай ресми жауап алыпты: «Әлеуметтік медициналық сақтандыру қоры» КЕАҚ деректері бойынша микротия және атрезия патологиясы бар балалар бюджет қаражаты есебінен шетелге емделуге жіберілетін балалар санатына жатпайды және медициналық көмек сапасының мониторингі департаментінің «Мұқтаж пациенттер» тізіміне енгізілмейді». Әлгіндей жауаптарды алғанда құлақсыз туған баланың жаны қалай жаурайды десеңізші? Шырылдаған ата-аналар ақырында «Қазақстан халқына» қорына барыпты. Бірақ Қор да қор қылып қайтарыпты. «Бізде бұл мақсатқа ақша қарастырылмаған» деген суық, суыт жауап берген. Қазақстанда аталған дертті емдейтін маман жоқ, әйтпесе естімейтін баласының жанайқайын билікке естірте алмай жүрген ата-ана Америка асып қайтсін? Бұл тек ресми тіркелген 3000-нан астам баланың әке-анасының жанайқайы, науқас ретінде тіркелмегендері тіптен көп», – деді депутат.
