Госорганы
Транзиттік хаб, энергетикалық қауіпсіздік: Тоқаев инвесторлар кеңесінде не жайында айтты
Қазақстан келешекте жыл сайын 100 миллион тонна мұнай өндіруді жоспарлап отыр, деді Қасым-Жомарт Тоқаев шетелдік инвесторлар кеңесінің отырысында.
«Мұнай өндіру соңғы 30 жылда үш есе өсті, бұл жетістік Қазақстанға мұнай өндірудің сенімді өсімімен 5 елдің қатарына кіруге мүмкіндік берді. Болашақта біз жыл сайын 100 миллион тонна мұнай өндіру межесін еңсеруді көздейміз», — деді Тоқаев.
Дегенмен жыл соңына дейін ел өндірісті 88 миллион тоннаға дейін қысқартады, бұған дейін 90,3 миллион тонна өндіру жоспарланған, деді бүгін энергетика министрлігінің басшысы Алмасадам Сатқалиев.
АЭС — ұзақ мерзімді инвестиция
Президенттің айтуынша, Қазақстанда алғаш рет салынатын атом электр стансасы елдің энергетикалық қауіпсіздігіне жасалған ұзақ мерзімді инвестиция болмақ.
Қазақстанның атом энергетикасын дамытудың әлеуеті зор. Біздің еліміз уран өндіру бойынша әлемде көшбасшы болып табылады және ядролық отын циклі толық дерлік бар. Жақында өткен референдум Қазақстанда атом электр станциясының құрылысын қолдады, бұл біздің энергетикалық қауіпсіздігімізге ұзақ мерзімді инвестиция», — деді Тоқаев.
Қазақстанда бұл жобаны жүзеге асыру үшін халықаралық консорциум құру мүмкіндігін қарастыруда, деп қосты президент.
Еуразияның транзиттік орталығы
Қазақстан Еуразиядағы негізгі транзиттік орталық ретінде позициясын нығайтады, деді Тоқаев.
«11 мың шақырым ескі теміржолды жөндеп, 5 мың шақырымнан астам жаңа теміржол желісін салуды жоспарлап отырмыз. Транскаспий халықаралық көлік дәлізін дамыту біз үшін басты басымдық болып табылады», — деді ол.
Ол дәліз Еуропа мен Азия арасындағы сауда жолын жылына 10 миллион тонна жүк айналымымен қамтамасыз ететініне сенімді.
