Тоқаев Ақордада энергетика министрі Ерлан Ақкенженовті қабылдады

Ақорданың баспасөз қызметі хабарлағандай, кездесуде мынандай негізгі мәселелер қаралған:

• отын-энергетика кешенін дамыту;
• мұнай өңдеу зауыттарының тұрақты жұмысы;
• биыл мұнай өңдеу көлемін 17,6 миллион тоннаға жеткізу;
• мұнай өңдеу саласын 2040 жылға дейін дамыту тұжырымдамасын әзірлеу.

Негізгі жобалардың арасында Қашаған, Қарашығанақ және Жаңаөзенде жаңа газ өңдеу зауыттарын салу, «Бейнеу – Бозой – Шымкент» магистральді газ құбырының екінші желісі мен «Талдықорған – Үшарал» газ құбырын жүргізу сынды жобалар айтылған.

Сонымен қатар, 2035 жылға қарай қуаты 26 ГВт-тан асатын жаңа генерациялау кешендерін іске қосу мәселесі талқыланғаны хабарланып отыр.

Ақорданың мәліметіне сүйенсек, президент министрге мынандай тапсырмалар берген: 

• мұнай-газ, мұнай-газ химиясы және электр энергетикасы салаларындағы инфрақұрылымдық жобаларды уақтылы және сапалы жүзеге асыру;
• энергетикалық қауіпсіздік сақтау, тұрғындар мен өндірістік нысандарды қуат көзімен тұрақты қамтамасыз ету;
• инвестициялық климатты жақсарту және геологиялық барлауға стратегиялық инвесторларды тарту.