Шерзат ісі: Нұрқанат Ғайыпбаев пышақталған соң көз жұмуы мүмкін бе еді

Сараптама нәтижелері

Маманның айтуынша, сот-медициналық куәландыру 2024 жылғы 9 қазанда, яғни, оқиғадан кейін бірнеше күн өткен соң жасалған. Тексеру нәтижесінде Ғайыпбаевтың денесінен түрлі жарақаттар табылған:

Бас және бет аймағы:

Сол жақ көздің астында 3–5 см көлеміндегі көгерген қанталау, оң жақ құлақ қалқанының өсіндісінде 2,0×1,0 см мөлшеріндегі қанталау анықталған. Шүйде тұсында жұмсақ тіндердің ісінуі мен қабынуы байқалған.

Дене және аяқ-қол бөліктері:

Бел аймағында қызыл түсті жұқа жара (мөлшері – 15×4,0 см), оң жақ жамбаста бірнеше қиғаш және тік жаралар тіркелген (1,2×0,1 см; 1,0×0,1 см және 0,8×0,1 см). Сондай-ақ жамбастың төменгі бөлігінде 8,0×3,0 см көлеміндегі терісі сыдырылған жара болған.

Тізе және шынтақ буындары:

Сол жақ тізе буынының алдыңғы жағында үш жара (мөлшерлері – 1,1×1,0 см; 0,9×0,8 см; 0,9×0,7 см), оң жақ шынтақ буынының алдыңғы және сол жақ шынтақтың артқы жағында да жарақаттар анықталған.

Клиникалық диагноз

Медициналық құжаттарға сәйкес, Нұрқанат Ғайыпбаевқа келесі клиникалық диагноз қойылған:

• Бас сүйек-миының жабық жарақаты, ми шайқалуы
• Маңдай бөлігіндегі жұмсақ тіндердің соғылуы, терінің сыдырылуы
• Шүйде аймағындағы қанталау
• Кеуде қуысы мүшелерінің жабық жарақаты
• Екі шынтақ буыны мен тізе буынының жұмсақ тіндерінің зақымдануы
• Оң жақ жамбастағы көптеген кесілген жаралар

Жарақаттардың сипаты мен ауырлығы

Сараптама қорытындысы бойынша, Ғайыпбаевтың денсаулығына жеңіл зиян келгені анықталды. Бұл жарақаттар қатты тұйық заттар мен шанша-кесетін құралдардың әсерінен пайда болуы мүмкін.

Жамбастың оң жағындағы жарақаттар шаншыла-кесілген сипатта болғанымен, ірі қан тамырлар зақымданбаған, сондықтан олар да жеңіл жарақаттар қатарына жатқызылды.

Естеріңізге сала кетейік, қазір тікелей эфирде 16 жастағы Шерзат Полаттың өліміне қатысты сот процесі өтіп жатыр.