«Сені тумағаным артық еді»: Шымкентте баласын аяусыз ұрған әйел видеоға түсіп қалды
Шымкенттегі ауруханалардың бірінде баласын аяусыз ұрып жатқан әйелдің видеосы тарады. Жантүршігерлік кадрларды жергілікті тұрғын Instagram парақшасында жариялаған, деп хабарлайды Stan.kz ақпарат агенттігі.
Видеодан әйелдің ауруханада баласын басқа адамдардың көзінше ұрып, былапыт сөздер айтып жатқанын көруге болады. Ол баласының жылап жатқанына мән бермейді. «Сені туғанша тумағаным артық еді», — дейді әйел.
Видео Желіде тарап кеткеннен кейін ауруханаға Шымкенттің бала құқықтары жөніндегі уәкілі Жаннета Жазықбаева келді. Оның сөзінше, әйел адам немере ағасына тұрмысқа шыққан екен. Қан араласып, екеуінің екі баласы қайтыс болып кеткен, біреуіне балалардың церебральды сал ауруы деген диагноз қойылған. Әйел адам видеоға түсіп қалған әрекетін түсіндірген. Оның сөзінше, баланы байқамай ұрып жіберген.
«Баланы не үшін ұрдыңыз» деп сұрағанымда ол байқамай ұрып жібергенін айтты. «Қалай байқамай ұрып жібересіз» деп едім, оған сол сәтте біреу хабарласып қалғанын жеткізді. Сөйтіп, бала жылап кеткен. Ол әйелдің бес баласы болған екен, екеуі көз жұмған. Бірінші баласы құсығына шашалып өлген, екінші дұрыс жетілмей көз жұмған», — дейді Жаннета Жазықбаева.
Оқиға Шымкент қалалық балалар клиникалық ауруханасында болған. Ауруханада бұл дерек бойынша тексеріс жүріп жатыр. Бастапқыда бала өкпе ауруына байланысты ауруханаға түскен. Бүгінде баланың жағдайы орташа, хаттама бойынша ем қабылдап жатыр.
«Бала 16 қарашада пневмониямен түскен. Бөлім басшысы бұл жағдай туралы хабардар. Ол баланың анасымен түсіндіру жұмыстарын жүргізді, әйелге психологиялық көмек көрсетілді. Баланың денесі көгермеген», — дейді Шымкент қалалық балалар клиникалық ауруханасы бас дәрігерінің емдеу бөлімі бойынша орынбасары Қаламқас Даумбаева.
