«Сарыарқа» құбырын Ресей Федерациясының газ құбырымен байланыстыру нұсқасы зерттеліп жатыр — министр
«Сарыарқа» құбырын Ресей Федерациясынан газ құбырымен байланыстыру нұсқасы зерттеліп жатыр. Бұл туралы ҚР Энергетика министрі Алмасадам Сәтқалиев Степногор қаласының тұрғындары алдында есеп беру кездесуінде мәлім етті, деп хабарлайды ҚазАқпарат тілшісі.
Кездесуде министр тұрғындарды ұзақ мерзімді баға тұрақтылығын және бағаның алыпсатарлық өсуін болдырмауды қамтамасыз ете отырып, сұйытылған мұнай газы нарығын реформалау жөніндегі шаралар туралы хабардар етті.
«Қазақстанның солтүстік және шығыс өңірлерін газдандыру жөніндегі QazaqGaz жобасын іске асыру шеңберінде биылғы жылдың соңына дейін аяқталу мерзімімен «Бейнеу-Бозой-Шымкент» 2-ші желісін жобалау бойынша жұмыстар басталды. Жобаны 2026 жылдың соңына дейін іске асыру жоспарлануда», — деді Алмасадам Сәтқалиев.
Сонымен бірге, ол министрлік «Сарыарқа» құбырын Ресей Федерациясынан газ құбырымен байланыстыру нұсқасын зерттеп жатқанын атап өтті.
«Алдын ала техникалық-экономикалық негіздеме әзірлеу аяқтау сатысында. Газ құбырының бағыты мен газ бағасын алғаннан кейін елдің солтүстік және шығыс өңірлерін газдандырудың оңтайлы нұсқасы айқындалатын болады», — деп түйіндеді министр.
