Қазақстанда жаңа зейнетақы жарнасы бекітілді
Жаңа жылдан бастап қазақстандық жұмыс берушілерді өз қызметкерлеріне төлейтін жаңа зейнетақы жарнасы күтіп тұр. Оны есептеу ережесін бекітетін қаулы ресми түрде жарияланды. Жаңа жылда қазақстандықтарды қандай өзгерістер күтіп тұрғаны туралы KAZ.NUR.KZ материалынан оқыңыз.
Қазақстанда базалық және ортақ зейнетақыларды, сондай-ақ қызметкердің зейнетақы жинақтары есебінен қалыптастырылатын Бірыңғай жинақтаушы зейнетақы қорынан (БЖЗҚ) төлемдерді қамтитын көп деңгейлі зейнетақы жүйесі қалыптасқан. Алайда, бұл жүйенің бір ерекшелігі бар – зейнетақының ортақ бөлігі жыл сайын азаяды, өйткені оны тағайындау кезінде тек 1998 жылдың 1 қаңтарына дейін, яғни қаржыландырылатын жүйе енгізілгенге дейін есептелген еңбек өтілі есепке алынады.
Елімізде ортақ зейнетақы төлемдерінің қысқаруымен қатар келешекте қазақстандықтарды барабар зейнетақымен қамтамасыз ету мәселесі де өзекті болып отыр. Оны шешу үшін үкімет жаңа зейнетақы жарнасын енгізбекші.
Қазіргі уақытта БЖЗҚ-да зейнетақы жинақтары жарналардың үш түрінен құралады:
міндетті зейнетақы жарналары (МЗЖ);
міндетті кәсіптік зейнетақы жарналары (МКЗЖ);
ерікті зейнетақы жарналары (ЕЗЖ).
Жаңа жылдан бастап осы үш жарнаға жаңасы – жұмыс берушінің міндетті зейнетақы жарнасы (ЖБМЗЖ) қосылады.
ЖБМЗЖ есептеу және беру ережелері мен мерзімдерін бекіту туралы тиісті қаулы премьер-министрдің ресми ақпараттық ресурсында жарияланды. Оған сәйкес, жаңа жарна 2023 жылдың 1 қаңтарынан бастап енгізілмекші.
Жаңа зейнетақы жарнасын енгізу халықты зейнетақымен қамтамасыз ету жауапкершілігін мемлекет, жұмыс беруші және жұмысшы арасында бөлуге, сондай-ақ зейнетақының ортақ бөлігін ауыстыру мәселесін шешуге мүмкіндік береді деп есептелінген.
ЖБМЗЖ-ны бес жыл ішінде, яғни 2023 жылдан бастап 2027 жылға дейін кезең-кезеңімен енгізу жоспарланып отыр. Оның нақты көлемі қызметкер жалақысының 5 пайызын құрайды.
