Қазақстанда бір емес, төрт рет декретке шыққан әкелер бар – ресми статистика
Қазір елімізде бала тәрбиесіне белсене араласатын әкелердің қатары көбейіп келеді. Сәбиі дүниеге келгенде әйелінің орнына бала күтімі бойынша декреттік демалыс алатын ерлер де бар. Мемлекеттік әлеуметтік сақтандыру қорының Azattyq Rýhy редакциясына берген ресми ақпаратына сүйенсек, 2025 жылғы 1 наурыздағы жағдай бойынша 450 095 адам бала күтіміне байланысты декретке шыққан, соның ішінде 769-ы – ер адамдар.
Мәселен, 2023 жылы декреттік демалысқа 583 ер адам шықса, былтыр 477 әке бала күтіміне байланысты жәрдемақы рәсімдеген. Ал осы жылдың басынан бері 66 ер азамат декретке шығып үлгерген.
Бала күтіміне байланысты әлеуметтік төлем алып отырған ер адамдардың 65 пайызы – 30 бен 40 жас аралығында. Декретке шыққан әкелердің дені сауда, автокөлік жөндеу, ғылыми және техникалық қызмет, өңдеу өнеркәсібі, құрылыс, мемлекеттік басқару және қорғаныс салаларында еңбек етеді.
Бір қызығы, декреттік демалысты бір емес, үш-төрт рет алған көпбалалы әкелер де бар.
«2025 жылғы 1 наурыздағы жағдай бойынша қордан бала күтіміне байланысты әлеуметтік төлем алатын ер адамдардың арасында төлемді алғашқы рет алып отырғандар саны – 636, екінші рет – 110, үшінші рет – 21, одан артық – 2», — дейді Мемлекеттік әлеуметтік сақтандыру қоры.
Республика бойынша декреттік демалысқа шыққан ерлердің ең көп үлесі Алматы мен Астана қалаларында, Жамбыл облысында тіркеліп отыр. Мысалы, Алматыда – 112, Астанада – 106, Жамбыл облысында 104 ер адам қазір бала тәрбиесімен үйде отыр.
Ал Ұлытау, Батыс Қазақстан, Абай, Қызылорда, Жетісу облыстарының ер адамдары декретке шығуға аса құлықты емес.
Естеріңізге салайық, ақпан айында Конституциялық сот енді Қазақстанда әкелердің де декреттік демалысы олардың еңбек кітапшасына қосылатынын мәлімдеген.
