«Пікіріміз екіұдай, күмән бар»: Екі партияның өкілі Бектеновты неге қолдамағанын айтып берді

“ Ескі мазмұнды жаңа формамен толтырудың қажеті жоқ”

– Партия керек болса өз қатарынан премьерлікке адамды ұсынар еді. Алайда біз қатарымызда бес адам ғана барын түсінеміз, – дейді Магеррамов.

Ол бұған дейін Әлихан Смайылов екінші рет премьерлікке қалған кезде де қалыс қалғандарын айтады. Сөзінше, ол кезде де халық партиясының өкілдері “мемлекет басшысы қойған міндеттерді орындай алмайды-ау” деген күдіктерін жеткізген.

– Бірақ біз қалыс қалған кезде премьер-министр депутаттардың ескертуін ескеріп, назарға алар деген ойда боламыз. Өкінішке қарай, бұл болмады (Смайыловтың тұсында). Біз әлеуметтік бағытқа бағдарланған экономика болар дедік. Ол болмады. Біз позициямызды бұл жолы да білдірген кезде жаңа премьер-министр жөнінде “ескі мазмұнды жаңа формамен толтырудың қажеті жоқтығын” айттық. Меніңше, бәрі түсінген шығар, – дейді ол.

“Бұл біздің позиция”

Ал ЖСДП өкілі Асхат Рахымжанов Олжас Бектеновтың кандидатурасы ұсынылады деп күтпегенін айтады. “Қалыс қалдыңыздар, неге қарсы дауыс бермедіңіздер?” деген сұрақ қойылды оған.

– Бектенов жемқорлықпен күрес бағытында тәжірибелі адам. ЖСДП президент және парламент сайлауында басты месседж ретінде жемқорлықпен күресті таңдап алған. Яғни, біздің фракция бүгінгі кандидатураға қарсы дауыс берсе, логикаға сыймайтын еді. Екінші жағынан, экономиканы бұл адам өзгерте ме? Бұл кандидатураны дұрыс білмейміз. Бұрын оның экономикалық жобаларды іске асырғанын немесе іргелілеткенін білмейміз. Сол себепті пікіріміз екіұдай – күдігіміз бар. Бұл біздің позиция, – дейді ол.

Еске сала кетейік, 6 ақпанда Олжас Бектенов Қазақстан Республикасы үкіметінің басшысы болып тағайындалды. 

Тоқаев Бектеновтың кандидатурасын Аманат партиясы ұсынғанын, оны өзі де қолдайтынын айтты. Осыдан кейін сөз алған Қазақстан халық партиясы, ЖСДП партиясының басшылары Бектеновтың кандидатурасын қолдамай, қалыс қалатынын мәлімдеді. Ал Аманат, Республика, Ақжол, Ауыл партиясы Бектеновтың кандидатурасын қолдады.

69 депутат Бектеновтың кандидатурасын қолдап, 7 депутат қалыс қалды.

Олжас Бектеновтың кандидатурасын «Amanat» партиясы ұсынған еді.

Ол жас

Саяси сахнада Олжас жас саясаткерлердің бірі. 43 жасында үкімет тізгіні қолына тиіп отыр. Алматының тумасы.

Бектенов қазақ мемлекеттік заң академиясын заңгер мамандығы бойынша бітірген (2001). Еңбек жолын 2002 жылы Алматы қаласы Әділет басқармасы бөлімінің бас маманы ретінде бастаған.

2005-2006 жылдары – ҚР премьер-министрі кеңсесінде заң бөлімінің сарапшысы, бас сарапшысы.

2006-2009 жылдары – ҚР президентінің әкімшілігінде қызмет істеді.

2009-2012 жылдары – ҚР әділет министрлігінің тіркеу қызметі және құқықтық көмек көрсету комитеті төрағасының орынбасары.

2012-2014 жылдары – ҚР экономикалық қылмысқа жəне сыбайлас жемқорлыққа қарсы агенттігінің (қаржы полициясы) орталық аппаратында департамент бастығы.

2015-2016 жылдары – Астана қаласы әкімінің аппарат басшысы, ҚР президенті әкімшілігінің басшысы хатшылығының меңгерушісі.

2016-2017 жылдары – сыбайлас жемқорлыққа қарсы іс-қимыл ұлттық бюросының (сыбайлас жемқорлыққа қарсы қызмет) Астана қаласы бойынша департаментінің басшысы.

2017-2018 жылдары – Ақмола облысы әкімінің орынбасары.

2018-2019 жылдары – ҚР мемлекеттік қызмет істері және сыбайлас жемқорлыққа қарсы іс-қимыл агенттігі төрағасының орынбасары.

2019-2022 жылдары – ҚР сыбайлас жемқорлыққа қарсы іс-қимыл агенттігі төрағасының бірінші орынбасары.

2022 жылдың ақпанынан 2023 жылдың сәуіріне дейін – Қазақстан Республикасының сыбайлас жемқорлыққа қарсы іс-қимыл агенттігінің төрағасы.

2023 жылдың 3 сәуірінде мемлекет басшысының жарлығымен Қазақстан Республикасы президенті әкімшілігінің басшысы болып тағайындалды.

ІІ дәрежелі «Айбын» (2014) және «Даңқ» (2021) ордендерімен наградталған.