«Жарық та, байланыс та жоқ»: Ресейдің жаппай атқылауынан Украинаның көптеген қаласы жарықсыз қалды
Киев қаласының көп бөлігінде электр қуаты өшті
Ресейдің жаппай атқылауынан кейін Украинаның көптеген қалаларында электр қуаты жоғалды, сонымен бірге ұялы байланыс пен интернет те өшті, деп хабарлайды Azattyq Ryhy тілшісі ВВС ақпараттық агенттігіне сілтеме жасап.
Киев қаласының тұрғындары электрмен қамтамасыз етуде болып жатқан үзілістерді айтты.
«Жарық жоқ, байланыс жоқ. Интернет жоғалып кетті. Ұлым екеуміз дәлізде отырдық және дабыл төрт сағат бұрын аяқталғанын да білмедік. Не болып жатқанын білу үшін көшеге шығуға тура келді», — дейді қала тұрғындарының бірі.
Тұрғындардың айтуынша, Киевтің солтүстігіндегі аудандарда ұялы байланыс толығымен жоғалып кеткен.
Ұялы байланыс пен интернет жұмысы электр энергиясының тұрақты жабдықталуына байланысты. Бүгінге дейін Ресей Украинаның 18 энергетикалық инфрақұрылымына соққы берді.
«Киевстар» компаниясы ұялы байланыстың жарық үзілген кезде де жұмыс істеуі үшін қолдан келгеннің бәрін жасап жатқанын айтты.
Станциялардың бір бөлігі желідегі жүктемеге байланысты үш-төрт сағат бойы жұмыс істей алатын автономды қуат көздерімен жабдықталған. Егер осы уақыт ішінде жарық болмаса, компания жылжымалы дизель генераторларын пайдаланады.
«Киевстар» қызметкерлері интернеттің неге бірінші кезекте жоғалып кететінін түсіндірді. Бұл жабдықтың жұмыс істеуі үшін үлкен қуат қажет, оны апаттық режимде пайдалану мүмкін емес. Телефон қоңыраулары үшін қолданылатын технологияларға көбірек басымдық беріледі.
Көктемде украиналық Vodafone, «Киевстар» және Lifecell ұялы байланыс операторлары ұлттық роумингті бастады. Егер бір оператордың желісі қолжетімді болмаса, басқаларына ауысуға болады.
Сонымен қатар цифрлық трансформация министрі Михаил Федоров Украинада Tesla Powerwall батареялары мен Starlink терминалдарында электр қуаты өшкен жағдайда қоғамдықWi-Fi нүктелерін құру жоспарланғанын айтты. Олардың алғашқысы қараша айында басталуы керек.
Егер Украина астанасы Ресей соққысынан жарықсыз, жылусыз және сусыз қалатын болса, Киев мэрі қала тұрғындарын алдын ала қор жинауға және қаладан тыс жерге көшуді қарастыруға шақырады. Виталий Кличконың айтуынша, дүрбелеңге түсетіндей әзірге себеп жоқ, бірақ жағдай күтпеген жерден өршіп мүмкін.
