Делдалдар көмірді екі есе қымбатқа сатады — Бәсекелестікті қорғау және дамыту агенттігі
Қазақстанда көмірді бөлшектеп, үлестес делдалдар арқылы көмір сату практикасын қолдану жалғасуда. Бұл туралы Stan.kz ақпарат агенттігі хабарлайды.
Бәсекелестікті қорғау және дамыту агенттігі көмір өндіруші компаниялар биржалық сауда-саттықты пайдаланатынын айтты. Онда олар отынның үлкен көлемін (3 миллион тоннаға дейін немесе жылдық жеткізілім көлемінің 71%-на дейін) сол жеткізушілерге бірнеше минут ішінде сатады.
«Бұл мәмілелер көмірді төлеумен де, жөнелтумен де қамтамасыз етілмейді, сондай-ақ мұндай делдалдардың тиісті инфрақұрылымы (қоймалар, тиеу-түсіру техникасы және басқалар) болмайды. Бұдан әрі делдалдар көмірді 100%-ға дейін жететін үстеме ақымен сатады», – деп түсіндірді ведомствода.
Өткен жылдың соңында «Халық Көмір» ЖШС «Каспий»ТБ» АҚ тауар биржасы арқылы «Қаражыра» АҚ-дан 120 мың тонна көмір сатып алды. Бағасы тоннасына – 6,5 мың теңге. Бірақ делдалдың өзі сол көмірді екі есе қымбатқа сатып, тоннасына 12 595 теңгеден ұсынған.
Агенттік көмір нарығындағы бәсекелестікті дамыту бойынш жол картасын қабылдағанын хабарлады. Бұл құжат отын қажетті инфрақұрылымы бар көмір тұйықтарына сатылатын биржалық сауда-саттықтың үлесі кем дегенде 50%-ға дейін өсуін қарастырады.
«2022 жылы тауар биржалары туралы заңнаманың бұзылуына байланысты БҚА 19 әкімшілік құқық бұзушылық туралы іс қозғады, алты тауар биржасы таратылды, оның төртеуі тексеру алдында ерікті негізде және екеуі сот шешімі бойынша тарады», – деп толықтырды баспасөз қызметі.
Мамыр айының соңында Қазақстаннан көмір әкетуге тыйым енгізілді.
