Болашақ көлік жүргізушілеріне қойылатын талап күшейтіледі
Өткен 6 жылда жол-көлік апаты саны күрт ұлғайып кеткен
Жүргізуші куәлігін алғаш рет алатындарға онлайн форматта дайындалуға тыйым салу керек. Бүгін Мәжіліс депутаттары осындай ұсыныс жасап, Үкіметке сауал жолдады, деп хабарлайды«Хабар 24» телеарнасы.
Гүлдара Нұрымованың айтуынша, емтиханға үйден дайындалу туралы өзгеріс 2016 жылы енгізілген. Өткен 6 жылда жол апаттарының саны күрт ұлғайды.
Биылдың өзінде бұл көрсеткіш 9 процентке жетіп, 13 мыңнан астам оқиға тіркелген. Соның салдарынан 2 мың адам көз жұмып, 18 мыңы жарақат алды.
«Жүргізушілердің көбі жол қозғалысы ережелерін сақтамайды. Болашақ жүргізушілерді дайындаудың орнына сертификаттар табыстап жүрген автомектептер де қаптап кеткен. Мәслен, қазір елде 747 осындай оқу орталығы бар», — дейді Г. Нқрымова.
Қалыптасқан жағдайды реттеу үшін депутаттар жауапты органдардың емтиханға дайындау стандарттарын тез арада өзгертуді талап етті.
