«Аза тұту апталығы жарияланды»: концерт кезіндегі өрттен 59 адам қаза тапты
Солтүстік Македония үкіметі Кочани қаласындағы концертте болған өрттен 59 адам қаза тауып, 155 адам жараланған қайғылы оқиғаға байланысты аза тұту апталығын жариялады, деп хабарлайды Azattyq Rýhy.
Үкіметтің мәлімдемесінде барлық мемлекеттік мекемелер мен ұйымдардың қаралы күн тәртібін ұстануға міндетті екені айтылды. Оны бұзғандарға қатаң санкциялар қарастырылған. Зардап шеккендерге медициналық көмек көрсету үшін елдің денсаулық сақтау жүйесінің барлық ресурстары жұмылдырылды.
Сонымен қатар оқиғаның объективті және жедел тергелетініне кепілдік беріліп, барлық ақпарат ашық түрде жарияланатыны хабарланды. Халықаралық көмек сұрау механизмі де іске қосылды.
Солтүстік Македонияның ішкі істер министрі Панче Тошковски қаза тапқандар саны 59-ға жетіп, 155 адамның жараланғанын мәлімдеді. Қалалық аурухана меңгерушісі Кристина Серафимованың айтуынша, қаза болғандардың жасы 14 пен 25 жас аралығында. Бұл трагедия бүкіл елді дүр сілкіндіріп, Солтүстік Македония халқы қаза тапқандардың отбасыларына қайғырып көңіл айтуда.
