Ажар Ғиният қазақстандықтарға МӘМС жарнасының 50% қайтару ұсынысына пікір білдірді
Ажар Ғиният қазақстандықтарға МӘМС жарналарының 50% қайтару ұсынысына қатысты пікір білдірді, деп хабарлайды ҚазАқпарат тілшісі.
«Бүгінде бұның барлығы заңнамалық тұрғыдан анықталған, бекітілген. Ақша қайтарылмайды. Биыл бұл адам ауырып-сырқамаса, онда жылына орта есеппен түсетін 100 мың теңгенің 50 мың теңгесін оған қайтару қарастырылмаған. Себебі келер жылы оған 1 млн теңгенің медициналық көмегі қажет болатын шығар… Сондықтан бұл көмек барлығына бірдей қол жетімді болуы үшін қаражат қайтарылмайды», — деді Ажар Ғиният Үкімет отырысынан кейін БАҚ өкілдерінің сауалдарына жауап бере отырып.
Ол сондай-ақ МӘМС жүйесі халықтың жағдайын жақсартуға оң әсер етекенін атап өтті.
«Мысалы, коронарографияны, миокард инфарктісі кезіндегі жіті коронарлық синдром дертін алайық – оны емдеу құны 1,2 — 1,5 млн теңге. Сондықтан бұл жүйе бастапқыда «дені сау адамдар науқастар үшін, байлар кедейлер үшін төлейтін ынтымақты жүйе» ретінде құрылған, — деп түсіндірді Ажар Ғиният.
