Астанадан Бурабайға 2,5 сағатта жететін жаңа электр пойызы іске қосылды
«Жолаушылар тасымалы» АҚ Астанадан Бурабайға небәрі екі жарым сағатта жететін жаңа «Burabay Express» электр пойызын іске қосты, деп хабарлайды Azattyq Rýhy.
Билет қанша тұрады
Электр пойызы аптасына бес рет жүреді. Билет құны әртүрлі: бірінші классқа жататын вагонға – 5 805 теңге, екінші класс – 3 586 теңге және үшінші класс – 2 962 теңге. Жолаушылар билетті пойыз алғаш рет жөнелтілгенге дейін 45 күн бұрын сатып ала алады.
Жаңа электр пойызы Астанадан сағат 11:00-де жөнелтіледі және Бурабайға сағат 13:35-те барады. Ал Бурабай курортынан осы күні сағат 14:15-те шығып, елордаға кешкі 17:00-де келеді.
«Электр пойызы Петропавл қаласындағы отандық зауытта шығарылған және барлық халықаралық стандартқа сай келеді. Жақын арада бұл пойызда жолаушылар үшін жылдамдығы жоғары интернет пен борттағы тамақтану қызметі қолжетімді болады. Жаңа кешенді сервистің арқасында жол бойы жолақы мен тағам ақысын онлайн немесе банк картасы арқылы төлеуге болады», — деп атап өтті «Жолаушылар тасымалы» АҚ.
Сонымен қатар пойызға елорданың екі вокзалынан да отыруға болады және курорт аймағындағы қонақ үйлерге кіру мен шығу үшін ыңғайлы кесте жасалған.
Вагондар жолаушыларды несімен таңғалдырады
Алты вагоннан тұратын электр пойызы 374 орынға есептелген.
Бірінші кластағы жолаушыларға арқалығы реттелетін, жеке үстелі мен багажға арналған сөресі бар өте жайлы креслолар ұсынылады. Ақпараттық және ойын-сауық контентін көруге арналған монитор орнатылған, Wi-Fi мультимедиялық жабдығы бар. Әрбір орында гаджеттер мен мобильді құрылғыларға арналған USB қосқыштары бар. Сапар кезінде қауіпсіздікті қамтамасыз ету үшін вагондарға бейнебақылау камералары қойылған. Жолаушыларға алғаш рет тамақ ұсынылады.
Екінші кластағы вагонның бағасы қолжетімді және қызмет көрсету деңгейі жоғары. Бейнебақылау камерасы, Wi-Fi мультимедиялық жабдығы, ұялы телефонды қуаттайтын құрылғылар бар. Сондай-ақ әртүрлі сусын мен мәзір ұсынылған купе-буфет ашылған.
Ал үшінші кластағы вагонда жылдам зарядтау функциясы кіріктірілген USB/Type-C розеткалары бар ыңғайлы креслолар қарастырылған. Тамбур аймағында велосипед қоятын орын бар. Сонымен қатар ерекше қажеттілігі бар жолаушыларға ыңғайлы болу үшін вагондар екі жағынан платформалық көтергіштермен және арнайы санитарлық аймақпен жабдықталған.
Бұған қоса барлық санаттағы вагонда биодәретханалар мен ерекше қажеттіліктері бар жолаушыларға арналған кеңейтілген кабиналар орнатылған.
Тегін трансфер
«Жолаушылар тасымалы» компаниясы атап өткендей, Rixos Borovoe қонақ үйіне баруды жоспарлаған жолаушыларға теміржол вокзалынан тікелей қонақ үй аумағына дейін тегін трансфер ұйымдастырылады. Вокзалға кіре берісте келген жолаушыларды көлік күтіп тұрады, осылайша жолаушылар демалыс орнына тоқтаусыз ыңғайлы жете алады.
