Жылдан-жылға өршіп барады: депутат бұзақылық жасағандар үшін жазаны қатаңдатуды ұсынды

Депутат соңғы кездері ел ішінде үрлық, орынсыз жанжал, бейәдеп әрекеттер мен көпшілік алдында төбелесу секілді оқиғалар жиілеп кеткеніне алаңдады. Айтуынша, мұндай бұзақылықтар қоғамда үрей тудырып, жұртшылықтың әділет пен тәртіпке деген сенімін әлсіретеді.

«Соңғы жаңалықтарға сәйкес, тіпті әкім орынбасарының өміріне қастандық жасау фактісі тіркеліп отыр. Сондай-ақ мектептерде бұзақылық өршіп тұр. Балалар мектепке оқуға бара ма, әлде біреуді ұруға, төбелесуге бара ма, адам баласы түсінбейді. Өкінішке қарай, қоғамдағы мұндай теріс әрекеттер тыныш өмірдің тамырына балта шабуы мүмкін, сондықтан бұл мәселеге бей-жай қарауға болмайды. Бұзақылықтың алдын алу тек пролицияның ғана емес, бүкіл қоғамның, әсіресе мемлекеттік органдардың ортақ міндеті болуға тиіс», — дейді Шиповских.

Бұзақылық жасайтындар көбейген

Бас прокуратураның ақпаратынша, Қылмыстық кодекстің 293-бабы, яғни бұзақылық бойынша 2010 жылы 26 адам сотталса, 2024 жылы 460 адам істі болған. Ал Әкімшілік құқықбұзушылық туралы кодекстің 434-бабы «ұсақ бұзақылық» бойынша 2022 жылы 15 282 іс тіркелсе, 2023 жылы 17 429, ал 2024 жылы 21 917 құқықбұзушылық тіркелген. Яғни статистика жылдан жылға өсіп жатыр.

«Мұның негізгі себептері – бұзақылықтың алдын алу тетіктерінің әлсіздігі, бейнебақылау жүйелерінің жеткіліксіздігі, профилактикалық жұмыстардың формалды түрде жүргізілуі. Құрметті Олжас Абайұлы, қоғамдық тәртіп пен азаматтық қауіпсіздік – әлеуметтік тұрақтылықтың негізі. Бұзақылыққа қарсы күресті күшейту үшін Үкімет тарапынан нақты шаралар қабылдау керек», — деп санайды сенатор.

Бұзақылық үшін жазаны күшейту керек

Бұзақылықтың алдын алу үшін Геннадий Шиповских Үкіметке бірнеше ұсыныс тастады:

• бұзақылық пен ұсақ бұзақылықтың алдын алу жөніндегі кешенді ұлттық жоспар қабылдау;
• жергілікті атқарушы органдар мен ішкі істер органдарының профилактикалық жұмысын күшейту, учаскелік полиция инспекторларының әлеуетін арттыру;
• жастар арасында тәртіп пен жауапкершілікті күшейтетін отбасылық тәрбие мен мектептегі моралдық-этикалық құндылықтарға негізделген жаңа бағдарламалар әзірлеу;
• қоғамдық орындарда бейнебақылау камераларын көбейту;
• бұзақылық жасағандарға, әсіресе қайталанған құқықбұзушылықтар үшін жазаны қатаңдату мәселесін қарастыру.