Түркістанға ерекше мәртебе беріледі: қалада не өзгереді
Сенат Түркістан қаласының ерекше мәртебесін беретін заңды мақұлдады, деп хабарлайды Ulysmedia.kz.
ЗАҢНЫҢ МАҚСАТЫ
Заңның мақсаты – Қазақстанның рухани-мәдени және тарихи орталығы ретінде Түркістан қаласының ерекше мәртебесін айқындайтын құқықтық негіздерді реттеу. Құжат Түркістан қаласының тарих және мәдениет ескерткіштері мен тарихи-мәдени мұрасы объектілерін, оның ішінде Қожа Ахмет Ясауи кесенесін сақтаудың және олардың бүтіндігін сақтап тұрудың тиімді жүйесін құруды көздейді.
Қожа Ахмет Ясауи кесенесі мен оның қорғау аймақтарының аумағындағы тарихи және мәдени ескерткіштерге археологиялық және ғылыми-реставрациялық жұмыстар жоспарланады. Тарихи-мәдени мұраны сақтап, дамыту, қайта жаңғырту және ұлттық қолөнерді дамыту үшін қадамдар жасалады. Түркістан қаласының тарихи-мәдени мұрасы объектілерін қорғау және пайдалану жөнінде қабылданған шешімдерді ғылыми тұрғыда қамтамасыз ету міндеті жүктеледі. Түркістан қаласының халықаралық ынтымақтастығын дамытуға басымдық беріледі.
Заңға сәйкес, тарихи-мәдени мұра объектілерін қорғау және пайдалану жөніндегі уәкілетті орган пайда болады. Ол орган Қожа Ахмет Ясауидің рухани-мәдени мұрасын зерттеу, зерделеу және кеңінен таныту жөніндегі шараларды іске асыру, Түркістан қаласының аумағындағы тарих және мәдениет ескерткіштерін сақтау үшін жағдай жасауға міндеттеледі. Түркістанның жергілікті өкілді органының, оның ішінде дизайн-кодты, қала құрылысы регламентін, өңірлік нышанды пайдалану тәртібін бекіту жөнінде шаралар қабылданады.
НЕНДЕЙ ТАЛАПТАР БАР
Түркістан облысы әкімдігіне транзиттік автомобиль көлігі қозғалысының схемалары мен тәртібін келісу құзыреті беріледі. Бұдан басқа, заңда тарих және мәдениет ескерткіштерін қорғауды қамтамасыз ету жөніндегі нормалар, сондай-ақ Түркістан қаласының археология және инфрақұрылым ескерткіштерінің резерватына қатысты нормалар айқындалады. Атап айтқанда, құрылыс салуды реттеу аймағында құрылыс жұмыстарын жүргізу кезінде сәулет келбеті бойынша олардың тарих және мәдениет ескерткіштерінен асып кетуіне жол берілмейді деп көзделеді. Қожа Ахмет Ясауи кесенесінің бірегейлігін сақтап, оның айналасындағы аумаққа құрылыс салуға жол бермеу мақсатында кесененің қорғау аймағының шекарасынан бір жүз метр қашықтықта биіктігі жеті метрден асатын және ауқымы, түсі және құрылыс материалдары бойынша тарих және мәдениет ескерткіштерімен үйлеспейтін объектілер салуға жол берілмейді.
