Госорганы
Депутаттар балаларды 12 жастан қылмыстық жауапқа тартуды ұсынды: Үкімет бұған не дейді
Қазақстанда қылмыстық жауапқа тарту жасы төмендетілмейді. Бұл туралы премьер-министр Олжас Бектенов депутаттық сауалға берген жауабында мәлімдеді, деп хабарлайды Azattyq Rýhy.
Бұған дейін Мәжілістің бір топ депутаты балаларды қылмыстық жауапкершілікке тарту жасын 14 жастан 12 жасқа дейін төмендетуді ұсынған. Алайда Үкімет бұл ұсынысты қолдаған жоқ.
«Жауапкершілікті 12 жастан бекіту балаларды қорғау мен тәрбиелеуге қатысты құқықтық және гуманистік көзқарастарға қайшы келеді. Себебі бұл жаста балалар өз әрекетінің қоғамға қаншалықты қауіп төндіретінін толық түсінбейді», — дейді Олжас Бектенов.
Осы орайда премьер әлемдік тәжірибені мысалға келтірген. Оның айтуынша, Германия, Жапония, Ресей, Финляндия және Ұлыбритания елдерінде қылмыстық жауапкершілік 14-15 жастан басталады.
