Екібастұз әкімі халықтың Instagram-да не істейтінін бақылау үшін 10 млн теңге шашпақ

Болашақ түлегі Аян Бейсекин басқаратын Екібастұз қаласының әкімдігі «ақпараттық мониторинг қызметтері үшін» 10 673 466 теңгенің лотын жариялады.

Айта кетейік, 2022 жылы 27 қарашада түнде Екібастұз жылу электр орталығында ірі апат болып, халық 30 градус аязда ұзақ уақыт жылусыз қалған болатын. Арада екі жылға таяу уақыт өтсе де бұл мәселе түбегейлі шешілмей, 2024 жылдың 2 шілдесінде Аян Бейсекиннің өзі қалада техногендік сипаттағы төтенше жағдай жариялады.

Қош, сонымен 10 млн теңгенің тендеріне оралсақ. Мемлекеттік сатып алу порталындағы деректерге сай, әкімдік қызмет көрсетуші тұлғадан әлеуметтік желілер мен басқа да онлайн-алаңдардың деректерін жинау және талдау жүйесіне қолжетімділікті ұсынуды талап етеді. Оның ішінде Вконтакте және Instagram әлеуметтік желілеріне басымдық берілген.

Оның ішінде мынадай талаптар бар:

• «ВКонтакте» және «Instagram» әлеуметтік желілерінің, сондай-ақ басқа да онлайн-алаңдардың қазақстандық сегментіндегі (Тапсырыс берушінің келісімі бойынша, кемінде 200 бірлік) ахуалын мониторингілеу және талдау;
• Қазақстандық пайдаланушыларға әсер ететін дереккөздерді (қауымдастықтар мен топтарды) анықтау.

Қызмет көрсетуші әкімдікке тоқсан сайын ақпараттық-талдамалық материалдар ұсынуға тиіс.

• Вконтакте әлеуметтік желісі бойынша есепте Екібастұз қаласының желі пайдаланушылары жазылған тақырыптық топтардың саны;
• анықталған тақырыптық топтардың сипаттамалары (контент сипаты, контент тілі, контент түрі бойынша хабарламалар мен жарияланымдар саны, географиясы, қолжетімділік, жазылушылар саны бойынша үздік ондық);
• тақырыптық топтарға жазылған Екібастұз қаласы желі пайдаланушыларының саны;
• тақырыптық топтарға жазылған желі пайдаланушылардың сипаттамалары (облыстың қалалары мен аудандары бөлінісінде жынысы, жасы, географиясы, тақырыптық топтарға жазылу саны, оқу орны (мектеп, университет), жұмыс орны, телефон нөмірі, әлеуметтік қатынастар, желіге шығу құрылғылары, белсенділік кезеңі).
• 

Instagram әлеуметтік желісі бойынша есептерде келесі мәліметтер болуы тиіс:

• Екібастұз қаласының желі пайдаланушылары жазылған тақырыптық топтардың саны;
• анықталған тақырыптық топтардың сипаттамалары (аккаунт санаты (егер көрсетілген болса), контент тілі, контент сипаты, географиялық тиесілігі (егер көрсетілген болса), телефон нөмірі (егер көрсетілген болса); — тақырыптық топтарға жазылған Екібастұз қаласы желі пайдаланушыларының саны;
• «Instagram» әлеуметтік желісінде: — пайдаланушының никнеймі/аты; — пайдаланушының url мекенжайы; — топтың атауы бойынша; — топтың url мекенжайы бойынша іздеу мүмкіндігі;
• тақырыптық топтарға жазылған желі пайдаланушылардың сипаттамалары (аккаунт санаты (егер көрсетілген болса), телефон нөмірі (егер көрсетілген болса), тақырыптық топтарға жазылу саны, тұтынылатын контент тілі, құпиялылық мәртебесі, бизнес/бизнес емес, географиялық тиесілігі*); пайдаланушылардың географиялық тиесілігі өңірлік топтарға жазылу санына қарай анықталады.

Мониторингке арналған онлайн-алаңдардың тізімін, сондай-ақ оларға қолжетімділікті әкімдік ұсынады. Деректерді жинау және жаңарту тәуілігіне кемінде 1 рет жүргізіледі.

10 миллиондық конкурсқа өтініштер қабылдау 25 шілдеге дейін жалғасады.