Антикор Шымкент мәдениет басқармасы басшысының 1 млн теңге пара алғанын айтты
Ол өзінің қарамағындағыдан еңбек шартын ұзартқаны үшін ақша алған
Шымкентте басқарма басшысы жемқорлық фактісі бойынша әшкереленді, деп хабарлайды Azattyq Ruhy.
Шымкент қаласы бойынша Сыбайлас жемқорлыққа қарсы қызмет Шымкент қаласы мәдениет, тілдерді дамыту және мұрағаттар басқармасы басшысының заңсыз әрекетінің жолын кесті.
«Ол өзінің қарамағындағыдан еңбек шартын ұзартқаны және қызметтегі жалпы қамқорлығы үшін 1 миллион теңге көлемінде пара алды деп күдіктелуде. Сотқа дейінгі тергеу жалғасуда», — делінген Антикор хабарламасында.
Қылмыстық-процестік кодексінің 201-бабына сәйкес өзге ақпарат жария етуге жатпайды. Конституцияның 77-бабы 3-тармағының 1-тармақшасына және Қылмыстық-процестік кодексінің 19-бабы 1-бөлігіне сәйкес, қылмыстық құқық бұзушылық жасаудағы кінәсі соттың заңды күшіне енген үкімімен белгіленгенге дейін әрбір адам кінәсіз деп есептеледі.
Бұған дейін хабарлағанымыздай, Шымкентте қала әкімдігінің Мәдениет, тілдерді дамыту және мұрағат басқармасының басшысы ұсталған болатын.
Сәкен Шәкеев аталған қызметке 2023 жылдың 10 наурызында тағайындалған болатын.
