Қазақстанда ақшасын депозитке теңгемен жинайтындар көбейген
![](https://matritca.kz/wp-content/uploads/2023/07/64b9154cd3113131941115-780x470.png)
Соңғы 6 айда теңгемен сақталатын депозиттердің үлесі 3 пайыз артып, 71,6 пайызға жеткен, деп хабарлайды Ulysmedia.kz.
Бұл туралы Ұлттық экономика министрлігінің 2023 жылғы қаңтар-маусымдағы әлеуметтік-экономикалық дамуының қорытындысында айтылған.
«Депозиттер 1 маусымға 30 629,2 млрд теңгені құрап, 2023 жылдың басына қарағанда 1% азайды. Заңды тұлғалардың депозиті – 3,8%, яғни, 14 трлн 711,4 млрд теңгеге дейін төмендесе, жеке тұлғалардың депозиті – 1,7%, яғни, 15 трлн 917,8 млрд теңгеге дейін көбейді. Ұлттық валютадағы депозиттер үлесі 2022 жылғы желтоқсандағы 68,4%-тен 2023 жылғы мамырда 71,6%-ке дейін өсті», — делінген құжатта.
Сондай-ақ, айналыстағы қолма-қол ақша көлемі 2023 жылдың басына қарағанда 0,3% азайып, 3 351,4 млрд теңге болған.
«Ақша массасы 1,2%, яғни, 33 трлн 890,6 млрд теңгеге дейін төмендеді. 2023 жылғы маусымда теңгенің АҚШ долларына ресми бағамы 1 АҚШ долларына 444,85 – 454,13 теңге аралығында құбылып, орта есеппен 2023 жылғы маусымда 1 АҚШ долларына 448,5 теңгені құрады», — дейді сарапшылар.
Айта кетейік, бұдан бұрын Қазақстанда ақшасын депозитке доллармен жинайтындар азайғаны хабарланған.