Демалыс пен мереке күндері сыйақы қалай төленеді
Мереке күндеріне сыйлықақы қалай тағайындалады және төленеді, ол бір реттік сыйлықақы болып есептеледі ме және қызметкердің еңбегінің нәтижесі есепке алынады ма? Бұл сауал электронды үкімет сайтына қойылды, деп хабарлайды Zakon.kz.
Еңбек және халықты әлеуметтік қорғау министрлігі еңбек қатынастары еңбек шартымен, жұмыс беруші актісімен, келісіммен және ұжымдық шартпен реттелетінін түсіндірді.
Еңбек кодексіне сәйкес еңбекақы төлеу жүйесі еңбек шарттарымен, ұжымдық шарттармен немесе жұмыс берушінің актілерімен белгіленеді.
Атап айтқанда, қызметкерлердің өндіріс тиімділігін және орындалатын жұмыс сапасын арттыруға мүдделілігін нығайту үшін жұмыс беруші ұжымдық шарттың талаптарында немесе жұмыс берушінің актілерінде айқындалатын сыйлықақы жүйелерін және еңбекті ынталандырудың өзге де нысандарын енгізуі мүмкін. Яғни, қызметкерлерді еңбектегі жеке нәтижелері мен жетістіктеріне қарай көтермелеу жұмыс берушінің міндеті емес, айрықша құқығы болып табылады және оларды ұжымдық шартпен, еңбек шартымен немесе басқарманың актілерімен реттеу арқылы дербес айқындалады.Еңбек министрлігі
Сонымен қатар, министрлік егер жұмыс берушінің шығарған актісінде Кодексте, еңбек, ұжымдық шарттарда, келісімдерде көзделген қызметкерлердің құқықтары мен кепілдіктерін бұзатын немесе нашарлататын ережелер болса, жергілікті еңбек инспекциясы жөніндегі органға немесе сотқа шағымдануға болатынын атап өтті.
