Шымкентте жуынатын бөлмеде оқушының мәйіті табылды

Шымкент қаласындағы жеке меншік үйде жасөспірім қайтыс болды. Ата-анасы баласының өлі денесін жуынатын бөлмеден тапты, деп хабарлайды Sputnik Қазақстан төтенше жағдайлар департаментіне сілтеме жасап.

Ресми мәліметке сәйкес, 10 қазан күні сағат 06.30-да жедел медициналық көмектен жазатайым оқиға туралы хабарлама түскен. Жуынатын бөлмеде оқушы бала қайтыс болды.

Қайғылы оқиға Еңбекші ауданының Маятас елді мекенінде болған. Төтенше жағдайлар департаментінің мамандары да сол жерге барды.

«Алдын ала мәліметтер бойынша, жуынатын бөлмеде туыстары 2011 жылы туған жасөспірімнің мәйітін тапты. Өлімнің себебі анықталуда, сот-медициналық сараптама тағайындалды», — делінген ресми хабарламада.