12 жаста босанған қыздың отбасы жайлы жаға ұстатар деректер айтылды

Отбасы Павлодар облысының Галкино ауылында тұрады. Олар 2019 жылы екі баламен Моңғолиядан көшіп келген.

«Қазақстанда тағы 3 бала дүниеге келді, қазіргі уақытта ана 2022 жылы туған кішкентай баланың күтімі бойынша демалыста. Анасы оқи да, жаза да алмайды. Тек өз атын жаза алады, құжаттарға солай қол қояды. Отағасы 6 сыныпты бітірген, ешқандай мамандығы жоқ. Мезгілдік жұмыс ретінде мектепте от жағушы болып жұмыс істейді. Қазіргі уақытта жұмыс істемейді», — деді Павлодар облысының балалар құқықтары жөніндегі өңірлік уәкілі.

Ата-ана үлкен қыздарының жүктілігі туралы 2024 жылдың 3 сәуірінде мұғалімдерден білген. Сол күні УДЗ жасалып, жүктілік расталған. УДЗ-дан кейін қыз 19 шілдеге дейін аудандық ауруханада дәрігерлердің бақылауына алынған.

«Ауруханада мектеп басшылығы оқу жылының соңына дейін онлайн оқытуды ұйымдастырды. Ауруханада болған 3 жарым ай бойы болашақ ана мектеп педагогикалық құрамының жеке қаражаты есебінен киім-кешек, аяқ киім, жуғыш заттар және азық-түлікпен қамтамасыз етілді», — деді Сәуле Шәкенева.

Дәрігерлер ерте жүктілікті сақтап қалып, 12 жастағы қыз салмағы 3 360 грамм болатын сау қызды дүниеге әкелді.

Сәуле Шәкенева облыстық перинаталдық орталықтан шыққаннан кейін ана мен сәбидің одан әрі тұратын орны туралы мәселе жақын арада шешілетінін атап өтті. Ата-анасы қыздарына қатысты зорлық-зомбылық фактісі туралы білмеген және күдіктенбеген. Олардың туысы қызды зорлағаны үшін күдікті деп танылды. Ата-анасы олармен қарым-қатынасты тоқтатқанын айтқан.

Естеріңізге сала кетсек, бұған дейін Павлодар облысында 12 жастағы қыз босанғанын хабарлаған едік. Ол тамыз айында 13-ке толады.

Жәбірленушінің туысы күдікті деп танылып, қамауға алынды. Қызды зорлау фактісі бойынша Қылмыстық кодекстің 120-бабы 4-бөлігі бойынша сотқа дейінгі тергеу жүргізілуде. Іс сәуір айында тіркелген. Қазіргі уақытта сот-психиатриялық сараптама жүргізілуде. ҚІЖК-нің 201-бабы негізінде басқа да мәліметтер жария етуге жатпайды.