«Тісін емдеген, Дубайда қыдырған»: Перизат Қайрат қайырымдылықтың ақшасын қалай жұмсағаны белгілі болды
Астанада Bizbergemiz Qazaqstan 2030 қоғамдық бірлестігінің негізін қалаушысы Перизат Қайратқа қатысты басты сот отырысы жалғасып жатыр. Прокурор Мадина Оразалина айыптау актісін жария етіп, айыпталушының қайырымдылық мақсатында жиналған қаржыны жеке қажеттіліктерге қалай жұмсағанын нақты мысалдармен баяндады, деп хабарлайды Azattyq Rýhy.
Прокурордың айтуынша, 2021 жылғы 28 желтоқсанда Перизат Қайрат рекреациялық орталық салу үшін жиналған ақшаның есебінен Toyota Camry маркалы автокөлікті Capital Rent a Car компаниясынан 600 мың теңгеге жалға алған. Бұл сома ForteBank-тегі қоғамдық бірлестік шотынан төленген.
Арада үш күн өткенде, 2021 жылғы 31 желтоқсанда, Қайрат анасы Ғайни Алашбаевамен бірге Астанадан БАӘ-ге ұшып кеткен. Олар 2022 жылғы 13 қаңтарға дейін Дубайда болып, 1 587 057 теңгені такси, мейрамхана және FlyDubai авиабилеттеріне жұмсаған.
Тергеу деректеріне сәйкес, Перизат Қайрат пен анасы алдын ала сөз байласу арқылы әрекет еткен. Олар қайырымдылыққа сенген азаматтарды алдап, 21 600 000 теңге көлеміндегі қаражатты жымқырған. Бұл қаражаттың барлығы балаларға арналған реабилитациялық орталық құрылысын жүргізу сылтауымен жиналған.
«Кейін Перизат Қайрат мүгедектігі бар балаларға көмек көрсетуді адамдар жақсы қабылдайтынын байқап, алаяқтық схемасын жалғастырған», – деді прокурор.
Ол ірі компанияларға қайырымдылық хаттар жолдап, сенім ұялату мақсатында кәсіпкерлермен кездесіп, жалған есептер мен презентациялар өткізген.
| Компания | Аударылған сома | Мақсат |
| «Батыл Казақстан» ЖШС | 1 000 000 ₸ | орталықты жөндеу |
| «Тиджин Индастрис» ЖШС | 2 000 000 ₸ | АҚШ-қа делегация |
| «Magnum Cash&Carry» ЖШС | 1 000 000 ₸ | қолдау |
| «Эдель Жанабават» ҚҚ | 3 000 000 ₸ | қайырымдылық |
Алайда бұл қаражаттардың бірде-бірі нақты мақсатқа жұмсалмаған. Барлығы жеке қажеттіліктерге бағытталған.
2023 жылы жазда Перизат Қайрат Central Asia Fest деген атаумен жалған іс-шара ұйымдастырған. Мерекелік іс-шара ретінде «Алматы Аренада» Алматы-Эне жобасын да өткізбек болған. Алайда ешбір іс-шара толыққанды өткізілмеген, ал азаматтар мен ұйымдардан 105 144 750 теңге жиналған.
Ақшаның нақты бағыттары:
- 13 200 000 ₸ – ақшаны қолма-қол ету;
- 19 715 000 ₸ – қор шоттары арасында аударылған;
- 10 000 000 ₸ – басқа қорға аударылған;
- 4 439 340 ₸ – 9 000 еуро сатып алынған;
- 21 182 426 ₸ – жеке қажеттіліктерге жұмсалған.
Оның ішінде:
- 3 299 000 ₸ – Anel Dent стоматологиясында тіс емдеуге;
- 11 324 000 ₸ – қолма-қол ақшаға айналдырылған;
- 4 692 100 ₸ – үшінші тұлғалардың есепшотына аударылған;
- 9 859 426 ₸ – жеке есепшоттарға түскен;
- 13 600 000 ₸ – тағы да қолма-қол ақшаға айналдырылған.
Бұдан бөлек, заңды табыс көзі болмағанына қарамастан, Алашбаеваның Kaspi bank есепшотына Қайрат Перизаттан 37 113 000 теңге аударылған.
Сот отырысында БАҚ өкілдерінің қатысуына тыйым салынды. Сонымен қатар, сотта Қайрат Перизаттың жоғары білімі жоқ екені де анықталды.
Естеріңізге салайық, Перизат Қайрат пен оның анасы мүгедек балаларға, сондай-ақ Қазақстандағы су тасқынынан және Таяу Шығыстағы қақтығыстан зардап шеккендерге қайырымдылық көрсету мақсатында жиналған 3 млрд теңгені жымқырды деп айыпталып отыр.
