«Шайымды өзім құйып ішемін»: Актриса Лидия Кәденова өзінің басқа енелерлерге ұқсамайтынын айтты
Талантты театр актрисасы, Қазақстанның еңбек сіңірген әртісі Лидия Кәденова «Егемен Қазақстан» басылымына берген сұхбатында өзінің қандай ене екенін айтты. Бұл туралы Stan.kz ақпарат агенттігі хабарлайды.
“Қатып қалған қағидалармен өмір сүрмеймін. Еркіндікті сүйемін. Қолымнан келгенше келініме қолғабыс етуге тырысамын. «Сен – келін, мен – ене» деп санасып отырмаймын. Жағдайым келіп тұрса немерелерімді де бағып, шайымды да өзім құйып іше беремін. Қазақ «Бала балдан тәтті, немере жаннан тәтті» деп бекер айтпаса керек. Дидарымнан көрген қызығым – Дияр мен Дәлила атты қос немерем бүгінде бар өмірімнің мәні. Бар тілерім – балаларымның амандығы”, – дейді актриса.
Өнер иесі жүрек түкпіріндегі арманымен де бөлісті.
“Балаларымның қызығын көрсем деп Алладан ұзақ өмір тілеймін. Өйткені Дидарым жалғыз. Сол жалғызымды жалғыз өзім жүріп жеткіздім. Енді ұлымның қуанышына куә болып, қасында ұзағырақ жүре тұрсам деген үлкен арманым бар. Алладан жалғыз-ақ тілерім – осы”, – дейді Лидия Кәденова.
Айта кетейік, актрисаның жалғыз ұлы Дидар Кәден бірінші әйелі блогер Айым Алтынбековамен 2015 жылдың қарашасында шаңырақ көтеріп, Алматыдағы қымбат мейрамханалардың бірінде тойын дүркіреп өткізген еді. Алайда араға бір жарым жыл салып ерлі-зайыпты ажырасып кетті. Бүгінде олардың ортақ Дияр есімді ұлы бар. 2021 жылы Дидар Кәден екінші рет үйленді. Оның бұл жолы таңдауы Лейла есімді биші аруға түскен. Олар Дәлилә есімді қыз тәрбилепе отыр.
