«Сатып кетуі оп-оңай»: Журналист Сәуле Әбілдаханқызының қандастарды «қауіпті» деген жазбасы тексеріліп жатыр
Белгілі журналист Сәуле Әбілдаханқызының Қытайдан келген қазақтар туралы мәлімдемесі желіде қызу талқыланып жатыр. Енді полицейлер қандастар туралы «қауіпті» деген жазбаны тексеруге кірісті. Бұл туралы Stan.kz ақпарат агенттігі КТК телеарнасына сілтеме жасап хабарлайды.
Сәуле Әбілдаханқызы Facebook парақшасынанда Қытайдан келген қандастарды мемлекет саясатына араластырмау керек екенін айтты.
«Қытайдан келген қандастарды мемлекет саясатына араластырмау керек. Моральдық қақысы жоқ. Үш-төрт ұрпақ ауысқанда болмаса. Олар «Қытай мектебін» көргендер. Өте қауіпті адамдар. Сатып кетуі оп-оңай. Сондайлардың мыңын жеке білемін», – деді Сәуле Әбілдаханқызы.
Сәуле Әбілдаханқызы Қытайдан оралған азаматтарсыз-ақ Парламенттің жұмысы жүреді деп, қандастардың шамына тиетін сөздер жазған. Журналистің бұл жазбасы оқырмандардың наразылығын туғызды. Әсіресе, көрші елден Отанына оралған қазақтардың ашуына тиген. Көп ұзамай автор постын өшіріп тастаған. Ал Алматы полиция департаменті қызу талқыға түскен жазбаны тексеріп жатыр.
Еске салайық, бұған дейін мемлекет басшысы Қасым-Жомарт Тоқаев Отанына оралған қандастар ел заңына бағынуға тиіс екенін айтқан еді. Президент елімізде «Заң мен тәртіп» қағидаты мызғымастай орнығуға тиіс екенін айтты.
