«Қызын үйінде өлтіріп, өзі аттракционнан секіріп кеткен»: Саябақта суицид жасаған әйелдің көршілері не дейді

Ал марқұмның көршілер 41 жастағы Юлияны үй шаруасындағы үлгілі әйел ретінде біледі екен. Күйеуінің табысы жақсы, зәулім үйде тұрады дейді. Отағасы жұмыста болған кезде әйелі қызын буындырып өлтірген. Алматыдағы Орталық мәдениет және демалыс саябағындағы жағдай жұрттың жағасын ұстаты.

Оншақты куәгердің көзінше 41 жастағы келіншек аттракционнан секіріп кеткен. Биіктен құлаған әйелдің денесінің сау-тамтығы қалмай, қатты соққыдан Юлия сол жерде көз жұмды. Жантүршігерлік оқиға кешкі уақытта саябақта болған. Өмірімен қош айтасуға бел буған әйел алдымен айналаны жоғарыдан тамашалауға мүмкіндік беретін аттракционға билет сатып алып, кабиналардың біріне отырған. Сосын жоғарыға көтерілгенде, 20 метр биіктіктен секіріпті.

Марқұм әйел Алматы облысы Іле ауданындағы жеке тұрғын үйде отбасымен болған. Келіншек өзіне қол жұмсамас бұрын өз үйінде жалғыз қызын тұншықтырып өлтірген. Көршілердің айтуынша, қайғылы оқиға болған кезде күйеуі үйде болмаған. Ал әйелдің бұрын-соңды оғаш қылығын байқамадық деп отыр.

«Біз ештеңе естімедік, жақсы тұратын. Ауқатты отбасы. Барлығы жақсы жұмыс істеді және жақсы өмір сүрді. Жыл сайын шетелге демалуға баратын. Білмеймін, не жетпегенін», — дейді көршісі Ольга Нұржаубаева.

Көршілер бұл отбасының осы ауылда тұрып жатқанына он жылдан асқанын айтады. Сырт көзге мұндай қылмысқа барады деп ойламадық деп шошып отыр. Марқұм әйел өте тиянақты, мұнтаздай еді дейді.

«Ешкіммен сөйлеспейтін, өзімен-өзі жүретін.Тып-тыныш әйел болатын. Қызының өзі сондай жақсы қыз болатын. Біз сондай жағдай болады деп күтпедік. Бір-біріне жақсы қарайтын. Өнегелі отбасы болды деп айтсам да болады», — дейді көршісі Наргиза Авезметова.

Саябақ қызметкерлерінің айтуынша, марқұм ұқыпты киінген, келісті келіншек болған. Қимыл-әрекетінен ешқандай оғаш қылық байқамадық дейді.

«Ол келіп карта сатып алды. Бізде карта жүйесі – турникет бар. Картаны сатып алып, дөңгелекке қарай қатты жүгірді. Қазір адам жоқ қой. Ол бірінші келді. Қыздар картамен оны өткізді. Сөйтіп кабинаға отырды. Бір қалыпты. Ешқандай орынсыз мінез-құлық байқалған жоқ», — дейді саябақ қызметкері Елена Кадет.

Марқұм әйел жедел жәрдем келгенше жан тапсырған. Қазір полиция өз-өзіне қол жұмсау дерегі және кәмелетке толмаған баланың өліміне қатысты қылмыстық іс қозғап, аза бойыңды қаза қылар оқиғаның мән-жайын анықтап жатыр.

«Қыз баланың қайтыс болу фактісімен тергеу жүргізіліп жатыр. Өзге ақпарат тергеу мүддесіне орай, жария етілмейді», — деді Алматы облысы ІІД ресми өкілі Меруерт Морякова.

Марқұм әйел мен кішкентай қыздың артында қара жамылып әкесі қалды. Қаза тапқан жанның мұндай қадамға баруына не себеп болғаны әзірге белгісіз.