Қызылордада жаңа салынған көп қабатты үйлер пайдалануға берілместен қирап жатыр

Қызылордада жаңа салынған көп қабатты үйлер пайдалануға берілместен қирап жатыр. Пәтерлердің ішкі есіктері дұрыс бекітілмегендіктен жабылмайды, деп хабарлайды Экспресс К .

Сапасыз салынған баспаналардың видеосы әлеуметтік желіде жарияланды. Бейнежазба авторының айтуынша, бұл көпқабатты үй әлі пайдалануға берілмеген. Онда пәтер ішіндегі есіктердің қисық орнатылғаны көрінеді. Сондай-ақ кейбір қабырғаларда әлден жарықтар пайда бола бастаған. Ал кафельдер жерге түсіп жатыр.

Сондықтан тұрғын азаматтарға мұндағы пәтерлерді алмас бұрын оның іші-сыртын мұқият тексеріп алуға кеңес берді.

«Бұл сол жағалауда салынған үй. Мұны жөндейді дегенге күмәнім бар. Сондықтан пәтер иелері алар кезде осыған мән беріңіздер», — деп жазды видео авторы.

Ал қалалық әкімдіктегілер дәл осы көпқабатты үйді жеке кәсіпкер өз қаражатына салғанын хабарлады. Десе де, олқылықтарды қалпына келтіру үшін тапсырма берілген.

«Қызылорда қаласының құрылыс бөлімі КММ-нің мамандарының арнайы тексеру жұмыстарын жүргізу барысында видеода көрсетілгендей ақаулар анықталды. Қазіргі уақытта ақауларды қалпына келтіруге арнайы ескертпе хат жолданды», — деп мәлімдеді қала әкімдігіндегілер.