Әділет министрі Азамат Есқараев Лакшми Митталдың Қазақстанның үстінен халықаралық соттарға шағым түсіру мүмкіндігіне қатысты пікір білдірді, деп хабарлайды Ulysmedia.kz.
Министр Есқараев “АрселорМиттал Теміртауды” ел меншігіне алу коммерциялық келісімшарт негізінде жүзеге асырылатынын, мәміленің құқықтың негіздері мұқият қарастырылып жатқанын айтты.
Сондай-ақ, ол компания инвесторының Қазақстанды сотқа беру ықтималдығына қатысты сұраққа жауап берді.
“Қазір нақты ештеңе айта алмаймын. Жағдай күн сайын өзгеріп жатыр. Өз мүдделерімізді қорғау үшін барлық шараларды қолданамыз”, – деді Есқараев.
Еске салайық, 28 қазанға қараған түні «АрселорМиттал Теміртау» кенішінде жарылыс болды. Жарылыс кезінде шахтада 252 адам болған, 206 кенші жер бетіне шықты, қалғандары жер астында қалып қойды.
Алғашқы екі күнде 45 кеншінің денесі табылды, ал 46-шы жұмысшының тек дене бөлшектері табылғаны белгілі болды. Қаза болған кеншілердің толық тізімі жарияланды.
Қазақстан президенті Тоқаев «АрселорМиттал Теміртаумен» ынтымақтастықты тоқтатуды бұйырды. Қайғылы оқиға бойынша сотқа дейінгі тергеу басталды.
Сондай-ақ, үкіметтің «АрселорМиттал Теміртау» АҚ акционерлерімен алдын ала келісімге келгені және кәсіпорынды Қазақстанның пайдасына меншік құқығына беру жөніндегі мәміленің аяқталып жатқаны хабарланды.
Қарағанды облысына барып, марқұм кеншілердің туыстарымен кездескен Тоқаев 29 қазанды жалпыұлттық аза тұту күні деп жариялады. Сонымен қатар президент «АрселорМиттал Теміртау» біздің тарихымыздағы ең нашар компания екенін атап өтті.
Қайғылы оқиғадан соң Қазақстанда «АрселорМиттал Теміртау» АҚ инвесторы Лакшми Миттал мен басқарушы Палаватху Кришнанды «қызметкерлердің қауіпсіздігін қамтамасыз етудегі қасақана әрекетсіздігі» үшін қылмыстық жауапкершілікке тартуды талап ететін петицияға қол жинау басталды.
Белгілі экономист, 2022 жылы президенттікке үміткер болған Мейрам Қажыкен билік Костенко шахтасындағы апатқа бар кінәні «АрселорМиттал Теміртау» компаниясының акционері Лакшми Митталға жауып отырғанын, ал шын мәнінде кеншілердің өліміне 90% үкіметтің өзі кінәлі екенін мәлімдеді. Алайда премьер-министр Әлихан Смайылов үкіметті ақтап, жауапкершілікті кәсіпорын басшылығына ысырды.
Үкімет компанияны мемлекет меншігіне беру процесі 30 қарашаға дейін аяқталатынын мәлімдеді. Ел билігі компанияға алдағы үш жылда кем дегенде 3 миллиард доллар салатын жеке инвесторды тартпақ.
