Қазақстанда тағы 40 градус ыстық түседі
Қысқа мерзімді салқындаудан кейін Қазақстанның оңтүстік өңірлері қайтадан жылы әрі құрғақ ауа массаларының ықпалында болады, деп хабарлайды Qaz365.kz.
Синоптиктердің мәліметінше, 8 тамыздан бастап Иран аумағынан жылы ауа келе бастайды, бұл күндізгі температураның +35…+41 градусқа дейін көтерілуіне әкеледі.
«Ал солтүстік өңірлер болса, бұрынғысынша суық ауа массаларының ықпалында қалады – найзағайлы жаңбыр жауады, кейбір аймақтарда нөсер жауын күтіледі, бұршақ жаууы да мүмкін», – деп хабарлады синоптиктер.
Қазгидрометтің болжамына сәйкес, 2025 жылдың тамыз айында Қазақстанда ауа райы айтарлықтай құбылмалы болады: кейбір өңірлерде аптап ыстық орнап, жауын-шашын болмайды, ал басқа аймақтарда керісінше – жаңбыр жауып, температура күрт ауысады. Айдың алғашқы онкүндігінде жылыну солтүстік пен шығысқа жетеді, ал оңтүстік пен батыста керісінше – аздап салқындайды.
Алдағы уақытта ауа райы тұрақсыз болмақ – ыстық күндер салқын әрі жауынды күндермен алмасып отырады, найзағай, бұршақ және шаңды дауылдар болуы ықтимал. Жалпы алғанда, жауын-шашын мөлшері норма шегінде болады, бірақ солтүстік пен шығыста нормадан асып түсуі мүмкін.
