Қазақстанда соңғы 10 жылда балалар арасындағы қылмыс неше есеге азайды
Оқу-ағарту министрлігінде Кәмелетке толмағандардың істері және олардың құқықтарын қорғау жөніндегі ведомствоаралық комиссияның 2025 жылғы алғашқы отырысы өтті, деп хабарлайды Azattyq Rýhy.
Кеңесте айтылған ресми статистикаға сәйкес, соңғы 10 жылда елдегі жасөспірімдер қылмысының деңгейі үш есеге төмендеген.
«Құқық бұзу фактілері көп анықталып жатқанына қарамастан, 2024 жылдың қорытындысы бойынша қосымша 5%-ға азайғаны байқалады. Дегенмен, Жетісу, Ұлытау, Павлодар, Ақмола, Қарағанды облыстары, сондай-ақ Астана және Шымкент қалаларында әлі де нақты және мақсатты шешімдерді талап ететін мәселелер бар», — деп хабарлайды министрлік.
Естеріңізге сала кетейік, соңғы бірнеше ай ішінде Қазақстанда балалар арасындағы төбелеске қатысты бірнеше резонансты оқиға болды. Мысалы, Семейде бір топ жасөспірім қатарластарын ұрып, оны видеоға түсірген. Ал, жуырда Теміртауда кәмелет жасына толмаған ұлдар қарт кісінің үйіне кіріп алып, оны ұрып-соққан.
